السلام عليكم ورحمة الله..
تحية عطرة،،
::الجزء الثامن عشر::
مرت سنه ومريم انتقلت بيت خالتها من بعد وفاة امها فكانت ترعى اخوانها وخالتها ام علي لانه وفاء في الجامعة وهاجر في المدرسة والوحيده الا تبقى في البيت مع خالتها
اجتمع الكل على الغدى وبين سوالفهم وشويه ضحك ينسون الالم رن التلفون وبسرعه وفاء رفعت السماعة
وفاء: الوووو
....:هلا بهالصوت هلا
وفاء بنفس خايسة: من؟؟
...: باجر عندكم زيارة لعلي حسن النجار الساعه 9 الصبح
وفاء بفرح: صدق؟؟ اوكي مشكور
...: انزين ما قلتي شنو اسمج؟؟
وفاء سكرت التلفون في وجهة ولا افتكرت فيه وعلى طول وبصوت رفيع :يممممه باجر زيارة لعلي
نزلت دمعة فرح من الام بعد سنة راح تلتقي فيه ومن فرحتها: صج؟؟ عيل بنسوي له حلاوته المفضله والايسكريم ووو
مريم تضحك ولدموع بعيونها: خالتي شوي شوي علي ما بياكل هالاكلات كلها
هاجر: شورانا نسوي والا يعجبه يختاره ..يااااااااااي وحشني علوان
نسوا الغدى وتموا سوالف وذكريات عن علي وكل وااحد فيهم يقول موقف واحلى موقف لوفاء
وفاء: مره اني وعلي رحنا البحر تمينا قاعدين نسولف وبدون ما نحس بالوقت ومره وحده طالعته الا ماكو احد اول الشي كنت متوقعه انه مقلب من مقالبه الا ما تخلص ناديته عليه بس مافي رد وبعدين طلعت روحي مافي احد المكان ظلام وعلي ما يجاوب مو لهدرجة يستغرق المقلب بديت اوسوس وقلت اكيد اختطفوا والا شي واني ما حسيت واني بخوف والا واحد طالع في وجهي خفت وتميت اصيح وهو يسكتني ومافي فايده هههههههههههههههههه
الكل ضحك على وفاء وتجهزوا لصلاة المغرب والكل عنده حماس انه يسوي احلى طبخة لعلي .. وهم في المطبخ واول الحاضرين كانت وفاء ومريم
مريم: وفاء من زمان ودي اقولج على شي بس مستحية
وفاء: افا عليج هذا واحنى خوات قولي يابعدهم كلهم
مريم: ياوفاء اني قطعت لعلي وعد من وعد الملوك اني اكمل دراستي بعد ما كان مصر على اني اكملها واليوم زادت فرحتي واصريت اني اكملها علشانه
وفاء: ياعيني وعد ملوك بعد من ورانا ولا يهمج تدرسين.. بس شنو المطلوب مني حبيبتي؟؟
مريم: باجر من الصبح نروح نسجل مواد ذاتية لاني سمعت يقولون هذا اخر اسبوع لتسجيل
وفاء: ان شاء الله بس اهم شي ما نتأخر على زيارة علي
دخلت هاجر: ليش نتأخر على زيارة علي ها؟؟
وفاء: كيفنا عاد .. وتعالي انتي ما وراج مدرسة؟؟
هاجر: ييييه مدرسة شسوي فيها باجر بشوف الغالي تقولين مدرسة!!
ام علي: بلا هواش هالحزة يالله كملوا الشغل
هاجر: ان شاء الله يمه اني بسوي المعكرونه ها
-------------------------------------------------------------------
في بيت خالد كان الاربعه مجتمعين مع بعض خالد وامهم وخلود وهدى الصغيره الا كانت دايما في حظن خالد ما تفارقه.. واليوم خالد متوتر شوي لانه عنده موضوع
ام خالد: شفيك حبيبي اليوم؟؟ متغير اشوف
خالد: مافيني شي يمه ..سكت برهه وتكلم يمة انا ودي اكمل نص ديني
ام خالد انفرجت اسايرها من الفرحة:بارك الله فيك ياولدي.. بس من هذي والا ودك ندور لك وحده؟؟
خلود تقلد بصوت امها: أي ترى عندنا احلى البنات اخلاق وجمال
خالد: ههههههههههه لا يمه بصراحة حاط عيوني على بنت النجار وياريت هذا ما يزعجج
ام خالد: شلون تعرفها؟؟.. ليكون عندك علاقة معاها والا..
خالد قاطعها بهدوء: يمه شنو هالافكار..لا اعرفها ولا شي بس كانت معانا في الجامعة
ام خالد بطيبه:ويه طلعت روحي على بالي شي ثاني ياولدي لا تشره عليّ بس خايفه عليك وعلى بنت الناس بعد.. ولايهمك اتصل فيهم باجر وان شاء الله خير
خالد: لالا يمه الحين الحين على الاقل خبريهم
ام خالد: ما بتطير البنت ياولدي
خالد: لاااااا يا الحين يا مافي بعد
ام خالد: انت صابر هالمده وساكت والحين مافيك صبر
خلود: يمه عادي الحين الساعه 7 مافيها شي
ام خالد: قل خيرا او فلتسكت.. انتي ما عندج الا لمدافع عن اخوج.. بس والله فشله ياولادي
خالد وخلود: لا فشله ولا شي عادي.. اتصلي اتصلي
بعد تردد رفعت ام خالد السماعة واتصلت: السلام عليكم
ام علي: وعليكم السلام
ام خالد: شلونكم؟؟
ام علي: بخير.. شخباركم انتوا؟؟
ام خالد: اكيد ما عرفتيني اني ام خالد بيت سعيد الناصري
ام علي: ياهلا وسهلا فيكم .. امري ياام خالد؟
ام خالد: ام علي يمكن الوقت مو مناسب بس ولدي طالب يد بنتكم .(تمسك السماعة وتسال خالد بهمس) شنو اسمها؟؟
خالد بهمس :.وفاء.. وفاء ويرفع ايده الله يالله تكون وفاء بمعنى الكلمه
ام علي: ان شاء الله يكون خير النسب.. أي وقت يناسبكم حياكم البيت
ام خالد: ان شاء الله.. لا ام علي قولي انتي الوقت يمكن ما يناسبكم الوقت الا يناسبنا
خالد بهمس ويأشر بأيده: باجر المغرب يمه باجر
ام علي: أي وقت ياحبيبتي يناسبكم يناسبنا
ام خالد: عيل باجر المغرب.. يناسب؟؟
ام علي: على راحتكم يا ام علي
ام خالد: مع السلامة
ام علي: الله يسلمج
الفرحة دخلت قلب ام علي اليوم الخير كله نازل عليها سجدت شكر لله..دخل ابو علي الصاله وشافها ساجده ابتسم وانتظرها ليما تخلص
ابوعلي: خير يا ام علي؟؟
ام علي: الخير بوجهك.. تعال اقعد بقولك السالفه.(قالت السالفه لأبوعلي الا فرح من قلبه)
ابوعلي: خالد سعيد الا يشتغل معاي ما غيره؟
ام علي: أي هذا هو
ابوعلي: والله ونعم الرجال ومافي منه..بس شلون تعطينهم وقت وفاء شنو رايها.. نادي على وفاء
وفاء قعدت تحت ابوها:ها يبه امر؟؟
ابوعلي: ما يأمر عليج عدو.. يابنتي في ناس جايين يخطبونج شرايج؟؟
وفاء: من هذا عاد؟؟
ابوعلي: خالد سعيد الناصري الا يشتغل معاي
وفاء بصدمة: رفيج علي ؟؟
ابوعلي: أي هذا.. شرايج؟؟
وفاء: الا تشوفه
ابوعلي: لا تستحين هذي حياتج يابنتي
وفاء:الا تشوفه يبه
ابوعلي: الصراحة يابنتي هم قالوا باجر المغرب بجون اذا كنتي ما تبين المقابله بقوله انج مو راضيه
ام علي: ليش ترفضونه من الحين حتى ما تكلمت معاه على طول لا تشوفه وبعدين تقول رايها والا شنو رايج بنتي؟؟
وفاء: باجر بجون؟؟ اوكي يمه بشوفه وان شاء الله خير
------------------------------------------------------------------
الكل قعد من صلاة الصبح ولا نام من الفرحة حتى خالد ما نام من الفرحة وينتظر المغرب بسرعه تجي
وفاء: يالله مريم ورانا شغل 7 بنروح ها
مريم:الساعة7 قلتينها بروحج ليش مستعجله
وفاء: مريوم بقولج شي .. تعرفين خالد رفيج علي؟؟
مريم: أي سمعت عنه مره تكلم عنه علي شفيه؟؟
وفاء: جاي يخطبني
مريم: والله؟؟ زين زين بالمبارك يارب يكون من نصيبج ونفتك منج
وفاء: مالت هذا واني جايه اشكي الحال
مريم: افا تشكين الحال شصاير ترى امزح معاج
وفاء بدلع: لا خلاص.. مريوم اليوم المقابله وبموت من الخوف تدرين سابقا كان كله يتطنز عليّ في الجامعه والحين يبي يخطبني ولكن ما انكر انه تغير 180 درجة
مريم: انزين اذا اهتدى وصار زين ليش خايفة مافي احد معصوم عن الغلط بس المهم انه ما يرجع لمثل الغلط
وفاء: اكيد
الى الساعه 7 وهم يسولفون وراحوا يسجلون في المدرسة مواد ذاتية لمريم الا شجعتها وفاء على انها راح تكون معاها واي صعوبة بتساعدها .. وراح الكل لعلي والفرح منسيهم الدنيا
علي كان في انتظار اهله تبادلول القبلات والاحضان بس كان بينهم حاجز طاوله تفصل بينهم
علي: شخباركم بعد؟؟ وحشتوني
ام علي: بخير ياولدي حتى انت لك وحشه بقلوبنا
وتموا طول الوقت يسولفون والاكل الا سووه كله نسوه بسوالفهم اما مريم فكانت شوي مستحيه
علي: شفيج مريوم تعالي هني ليش قاعده بعيد
مريم: لا عادي بس بقعد هني
علي تركها براحتها لانه راح يكون معاها نصف ساعه وهذا الوقت بيخصصه لأهله.. في نهاية الزيارة الام قعدت تجهز الاغراض وتحط الاكل في الاكياس
وفاء انتهزت الفرصه وحاولت تتكلم بصوت واطي مع علي: علوي بقولك شي
علي: قولي عمري
وفاء: رفيجك خالد تقدم لي.. شرايك فيه؟؟
علي ابتسم: ونعم الرجال مافي مثله بصراحة.. اذا كنتي تبين رايي اسألوا عنه واذا مافيه شي اقبلي فيه ما بتحصلين مثله
وفاء اطمأنت شوي: ان شاء الله.. الليله بجون المقابلة شقوله علوي؟؟
علي ضحك على اخته: صج ياهل كل شي ودج تسألين.. اسالي مريم وبتعلمج ههههههههههههه
مريم: شنو شنو سمعت اسمي؟؟
علي: ما نعلم جهال
وفاء وعلي: هههههههههههههه
الكل طلع من الغرفة ماعدة مريم الا لها حق تقعد مع زوجها لمده نصف ساعه ساد الصمت بينهم
علي: عظم الله اجرج يالغالية.. ولو انها متأخره
مريم: اجرنا واجرك يالغالي
علي: شلون امور الحياة ماشيه معاج؟؟
مريم: الحمدلله بخير عمي مو مقصر
علي: والدراسة؟؟
مريم: اليوم رحت سجلت مواد ذاتية
علي: بارك الله فيج عمري واي شي تحتاجينه عندج وفاء وهاجر لا تستحين
مريم: ان شاء الله
بعد صمت
علي: يا مريم انتي تدرين إني بكون 20 سنه في السجن وانتي على ذمتي اذا حسيتي بضيق...
مسكت مريم ايده: لاتكمل بكون معاك في الحلوه والمره لو انتظرك سنين العمر كله لا تظن في يوم بتراجع عنك ..نزلت دموع مريم بسخاء
وهو بالمثل سمح لدموعه تنطلق بسخاء: الله يقدرني واعوضج على سنين الا نحرمتي منها
مريم: ان شاء الله
الشرطي الا وراهم انتبه ان مريم ماسكه يد علي: لا تلمسها
علي: ليش؟؟ هذي زوجتي
الشرطي: قلت لك ممنوع
مريم اشرت لعلي بعيونها انه يسكت عنه..وفي نهاية الزيارة ودع مريم وهمس بأذونها
علي: حبيبتي انتظر منج الرسائل
مريم ان شاء الله.. تحمل بروحك
علي: من عيوني وانتي بعد تحملي بروحج
مريم: من عيوني مع السلامة
علي: في حفظ الباري
انتهت الزياره ورجع الكل بيتهم مستانس
واني بعد خلصت انتظروني في الجزء التاسع عشر واتمنى اشوف توقعاتكم وانتقادكم
خالد بيتزوج وفاء والا بترفض والا شنو؟؟