~::خلف زنزانه الالم... قصة::~

ننتظر باقي الأجزاء بفارغ الصبر


تحياتي الورديه


المهموم

[الحنونة]

سلام

أختي شوقتينا للقصة أكثر وأكثر

بســـــــرعة لو سمحتين

تحياتي ،،،،

[تقوى القلوب]

اهلا وسهلا بالاخوة

خادم الحسين الاروع حضوركم اما عن انها لن تنتهي فهي لن تنتهي الا بعد نفاذ البندول خخخخ

بابا سنفور الاحلى تشجيعكم ابذل كل ما بوسعي اخي لكي اضع لكم الاجزاء وسأحاول اكثر

المهموم ها هي الاجزاء بين يدي سأضعها مباشرة بعد هذا التعقيب اتمنى ان يعجبكم

اختي الحنونة ان شاء الله يالورده على ما يبدو انني سأسهر هذه الليلة لكي انتهي منها
وتنتهوا انت مني

ولا حرمني الله من وجودكم هنا

تحياتي

[تقوى القلوب]

السلام عليكم ورحمة الله..

تحية عطرة،،

::الجزء التاسع::
من بعد وفاة الوالد ظل خالد متحمل مسؤلية كل صغيرة وكبيرة في البيت ولا يطلع بره البيت الا للجامعة او شي ضروري..

حاول خالد يحصل على شغل يعيش فيه عائلته الجديدة إلا صارت في عهدته فكان كل يوم يروح شركة او بلدية يتمنى يحصل لو شغلة فراّش مو مشكلة بس للاسف انسدت كل الابواب في وجهة


خالد مع محمد في الجامعة والمحاضرة انتهت بس هو في عالم ثاني طلع من المحاضرة وعلامات الحزن واضحة على وجهة
وراحوا للمكتبة يدورون جم كتاب للاسايمنت
محمد: شفيك خلود؟؟
خالد: ولاشي
محمد: بلا هرار أقول اقعد وقولي شفيك؟؟ ترى صار لك من وفاة أبوك متغير أنت
خالد: صار لي شهر يا محمد أدور لي شغل لا عندي فلوس للجامعة ادرس فيها ولا حتى اعين فيها اهلي
محمد: حاول لا تيأس يا خالد ما تعودنا منك انك تيأس.. خلود شوف من دخل المكتبة ام لسان!!
خالد ولاول مره ينزل راسه : استح على وجهك شكبرك وتطالع في البنات
محمد: اوووه اسمع من يتكلم اقول قوم قوم المكان صار ظلام هني

-------------------------------------------------------------------
البنات راحو للكمبيوترات وكل وحده فيهم تفتح المسنجر والثانية تفتح احد المنتديات
مريم: وفوي ما تحسين ان خالد فيه شي صار له شهر وهو كله حزين
وفاء: من وفاة أبوه وهو حزين الظاهر انه متعلق فيه واايد
مريم ونوراء: أييي الله يكون في عونه
نوراء: باقي أسبوع ونفتك من الجامعة وخرابيطها
وفاء: أي والله.. والقهر هالدكتور على اخر شي يبي الاسايمنت
مريم: أي صدقتي واحد فاضي الصراحة

وتموا البنات يسولفون عن اخر اسبوع لهم بالجامعة وتجي الامتحانات وينتهون من معاناة الجامعة ولو انه وقت قصير للعطلة
-------------------------------------------------------------------
اتصل خالد في علي وطلب منه موعد عشان يقعد معاه شوي وعلي بطبعة يحب خالد فرحب فيه وتواعدوا على انهم يتقابلون في بيت علي وفي المجلس قعد كل من خالد وعلي مقابلين بعض على الكراسي

علي: ها.. شخبارك في الجامعة
خالد: افكر اني انسحب
علي: ليييش ياخوي؟؟
خالد: شسوي بعد للحين ما حصلت شغل واذا حصلت ما يكفي حتى لقمة عيشي
علي: أي والله صدقت في هالبحرين الناس تموت على لقمة العيش!! العيشة صعبة.. انزين وانت حصلت لك شغل؟؟
خالد تنفس بعمق: للاسف لا.. كل مكان رحته وطلبت حتى على اني اكون فرّاش بلدية بس كله يقولون لك فيه كفاية
علي: ههههههه أي والله كفاية يشغلون الاجنبي واحنى بطلعة روحنا نشتغل
خالد: أيييي يا خوي.. الا تعال اسمع يقولون العفسة زايدة في الديرة
علي: اسكت حبيبي ترى الدنيا منقلبة الظاهر بترجع ايام السبعينات
خالد: لا ان شاء الله.. لاتقول جذي
علي: ان شاء الله
وانقطع عليهم سوالفهم بطرقات خفيفة على الباب وعلي على طول قام راح وكانت خواته ومعاهم العشى
خالد: لا علاوي لا تعبون روحكم انا بروح الحين
علي: لا تعب ولا شي.. وما في طلعة من بيتنا الا اول شي تتعشى وبعدين نطردك ههههههههه
خالد بالمثل ضحك على علي وحس بالقرب أكثر من احد ثاني من اصدقائة
وبعد ما خلصوا من العشى راح خالد بيتهم على انهم يلتقون بوقت قريب

وعلي قعد من خواته وابوه وامهم الا الدنيا مو سايعتها الفرحة
ام علي: ها علاوي حبيبي متى نحدد موعد الزواج ؟؟
علي: براحتج يمه أي ليلة تناسب للعقد وتناسبج
أبو علي: شخبار خالد؟؟
علي: والله مسكين يفكر ينسحب من الجامعة وحاول يدور له شغل بس خبرك كله مافي شغل
أبو علي: الله يكون بعونه
أم علي: يا بوعلي إذا عندك مكان تشغله شغله حتى لو شغلانه بسيطة
أبو علي: خير إن شاء الله..
علي: انا استأذن بقوم أروح أنام
أم علي وأبو علي: الله معاك حبيبي تصبح على خير

هاجر سحبت يد وفاء وراحوا لعلي غرفته وبدون ما يستأذنون دخلوا
علي: بسم الله شفيكم؟؟
هاجر: والله كيفنا نبي نقعد الليلة مع اخونا المعرس فيها شي؟؟
وفاء: ونرجع ايام اول قبل لا تاخذك ست الحسن والجمال
علي: طلعوا بره ثنتينكم
وفاء قعدت على السرير: والله ما بنطلع الا امر من الحكومة (يقصدون الوالد والوالده)
علي: جذي يعني تتحديني؟؟ ( وراح بينادي عليهم بس سحبته هدى على آخر لحظة) ها اشوفكم خفتوا
هاجر تترجاه: يالله عاد والله ليلة وحده نسهر فيها مافيها شي
وفاء وهي تنتقز على السرير: أي أي صح كلام هدى
وركبت هاجر فوق السرير مع اختها: ولا اله الا الله كلكلكوووووووش والف الصلاة على النبي
وركب وياهم علي وصارت الفوضى ولأنه علي شبع من التصفيق ولمصافر صارت المطاردة مع خواته يبي ينتقم منهم لأنهم قلبوا حجرته فوق تحت والضحك الا واصل لآخر الدنيا

وبعدها قعدوا كل مع بعض سهرانين لصبح كل وااحد يشكي الحال لبعضهم وكأنهم اط
فال صغار
------------------------------------------------------------------
خالد بعد ما رجع للبيت حس بفوضى في الفريق الثاني وراح فوق بيتهم وشاف شباب وشرطة واقفين وصياح الام ولصراخ الا يقطع القلب
وخلود سمعت لصراخ بعد وعلى طول ركبت وشافت اخوها واقف يطالع ونادت عليه بهمس وانتبه لها وكملوا مطالعهم بصمت وحزن ومره تدمع العين ومره يذوب القلب والحسرة على الا قاعد يصير والا يوضّح انه في شي جايد راح يصير لا محال

يا ترى شنو قاعد يصير في البيت الثاني؟؟

تحياتي

[بابا سنفور]

نتمنا تواصل القصه
تشكرين اختي

[لِمَنْ يَتَوَسّد الشّوك !]

يلاااااااااااا الحين الحين كملييييييي

[خادم الحسين]

افا بس افا! يوم الاكشن خلصت القصه!:p

يالله الليله نبي الجزء اللي بعده..

الله اساعدكم..

اخوكم في الله..

[تقوى القلوب]

اهلا بالاخ بابا سنفور سأواصل ان تواصلتم لك جزيل الشكر على متابعتك

اهلا بالاخت لمن يتوسد الشوك انني اكتب في الجزء العاشر فنتظروني

اهلا بالاخ خادم الحسين الاكشن ما بيخلص دام دخلت في السياسة اني .. راحت عليي من ابو علي

شكرا لتواجدكم وتواصلكم لا حرمني الله منكم اخوتي

تحياتي

[بنت العلا]

بسرعه حطي القصه
انتين قاعدة تضربين عالوتر الحساس و يا الموت يمكن الله يهديني على ايدش و تقل ذنوبي
و الله العظيم صيحتيني

[بنت العريبي]

السلام..

قصة في غاية الروعى والجمال

واني اندمجت وياها

مشكورة اختي تقوى القلوب

على القصة الجميلة والحلوة

وننتظر الجزء العاشر

بفارغ الصبر

وارجوش اتحطينا لينا

وشكرا

تحيااتي,,

[لِمَنْ يَتَوَسّد الشّوك !]

بعدش ما كتبتينها.... يلا لا

[تقوى القلوب]

السلام عليكم ورحمة الله...

اهلا بالاخت بنت العلا شكرا لنضمامكِ معنا وتشجيعي والقصة خيو بغيت منها انها تكون فيها شوي
عبرة يعني وان شاء الله نكون كلنا نعتبر وحتى اني وياكم

اهلا بنت العريبي الاروع حضوركِ عزيزتي اتمنى الجزء العاشر يعجبش

اهلا لمن يتوسد الشوك عزيزتي ارجو منكِ السموحة ولكل من انتظرني والسبب مرض اختي المفاجئ
ادعوا لها بالشفاء وتجيب لينا علاوي بسرعة

لا حرمني الله منكم اعزائي

تحياتي

[تقوى القلوب]

السلام عليكم ورحمة الله...

تحية عطرة،،

::الجزء العاشر::

سمع خالد الصراخ وراح فوق سطح بيتهم ومعاه خلود الا بالمثل تفاجئت وكان الشرطة يطالبون بأخذ ولدهم المتهم انه سبب حريق في احد الشوارع
وبعد توسلات الام للشرطة ان ولدها مو في البيت واصرارهم على اقتحام البيت دون مراعاة حرمة المنزل وبعد ساعة مضت جاء الولد الصغير البالغ من العمر 17 سنه وبكل شجاعة سلم نفسه للشرطة الذين لولا آخر لحظة لشنوا الهجوم داخل المنزل ولخوف هذه الولد على أهله وأخواته من هتك حرمتهم

بكت خلود بكل حرقة الم وفجأة رفع احد الشرطة رأسه وشاف خالد الا تلاقت عيونهم بعض وعلى طول خالد حس بخوف ونزل على الارض وما صار لهم 10 دقايق والا طرقات قوية على باب الام وخلود ترجوا خالد انه يختفي في أي مكان وعلى طول خطرت على باله انه يتخبى في زريبة للحمام الا كانت الام تحب تربيهم وفوق السطح بعد كانت موجوده

وتخبى ورى قفاصات الحمام وتغطى بقطعة قماش والحمدلله بعد ما فتشوا المكان ما لقوا شي والغريب انهم تقربوا من الزريبة ولا شافوا احد مع انه كانت رجله واضحة وضوح الشمس

الحمدلله انه هالليلة عدت بسلام والام تفاجئت وخلود بالمثل
خلود تضحك: الحمدلله ما شافوك ياخوي
ام خالد: الحمدلله.. هذي نعمة من الله
خالد: تدرين يمة لو لا الله حارسني والاية الا قريتها جان خلود ما عندج الليلة
ام خالد ضربت ولدها على كتفه بخفة: لاتقول جذي ما عندي غيرك
خالد: ان شاء الله
خلود جاها فضول: خلّود انت شنو الايه الا قريتها ؟؟
خالد: بسم الله الرحمن الرحيم (وَجَعَلْنَا مِن بَيْنِ أَيْدِيهِمْ سَدًّا وَمِنْ خَلْفِهِمْ سَدًّا فَأَغْشَيْنَاهُمْ فَهُمْ لاَ يُبْصِرُونَ ) صدق الله العلي العظيم (سورة يس اية 9 )
خلود: ما شاء الله ومن وين حافظها؟؟
خالد: اممممم خليها سر
خلود: يالله عاد قولي ما بقول لأحد
خالد: انظميت لدروس دينية يلقيها احد لشيوخ
ام خالد من فرحتها بولدها حظنته وظلت تقبله وتتحمد ربها على هداية ولدها
---------------------------------------------------------------
ابو علي اتصل لخالد بعد ما انتهوا من الجامعة حتى يخبره بالشغل الا راح يستلمه من بكرة وعلى طول خالد اتصل الى علي يخبره
خالد: علاوي تدري اليوم من اتصل فيني
علي الا متكسر من الغشل في الورشة وهو يمسح جبينه بأيده: مرتي؟!!!
خالد: تنكت انت! لكن الغبي الا يجي يخبرك بشي
علي ضحك على خالد: ههههههههههه انزين تعال تعال من متصل لك؟؟
خالد: ابوك وقال لي اشتغل معاكم من باجر
علي يمثل انه معصب: شنو شنو ما في حبيبي ما عندنا شغل لك
خالد : والله عاد مو كيفك حره عليك باجر من الصبح انا عندك حره عليك
علي: ههههههههه ان شاء الله.. ما بنلقى مثلك يشتغل معنا
خالد: احم احم ادري ههههههههههههههه يالله مع السلامة
علي: ههههههههههه الله يسلمك.. تعال بقولك نسيت ليلة الخميس معزوم على خطوبتي
خالد: صج؟؟؟
علي: أي صج
خالد: مبروووووووووووووك حبيبي عقبالي ان شاء الله( وهو رافع ايده)
علي: مستعجل على العرس انت؟؟
خالد: يعني انت الا مو مستعجل.. يالله باي باي خلص لكردت عليك
علي: خخخخخخ لا خله يخلص علي ما استاهل انا؟؟
خالد: امبلا تستاهل يالمعرس
علي: يالله مع السلامة يالعازب
خالد: هههههههههههه الله يسلمك

علي بدى يسترجع كلام خالد ( يعني انت الا مو مستعجل على العرس): اه ياخالد لو تدري فيني ما قلت مستعجل عليه انا كل يوم احاول اعيش مع الوضع حتى لا انصدم واحطم حياة البنت.. الله يسامحج يا يمه
------------------------------------------------------------------
الكل اليوم فرحان الزينة في كل زاوية وأنواع العطورات والبخور والمعازيم كلها حظرت ام علي مو عارفة تسوي شي من فرحتها ترحب في الناس والا تكرمهم والبنات هدى وفاء وحتى حنان كانت متعدله ومستانسة وكل وحده فيهم رافعة شعرها الطويل شوي وحلزونات مرفوعة ما عدى هدى الا شعرها قصير ومسويته كرلي (سوري ما اعرف لهسوالف لذى اختاروا تسريحات بروحكم خخخ)

دخلت العروس والكل سم بالرحمن كل هالجمال والحلة مغطية على القمر اليوم يا ويلك يا علي يا سكته قلبية والا ارتجاجات خفيفة في المخ

حنان اختفت بعد ما سلمت على العروس وصورت معاها ولا أحد شافها ولاحس فيها إنها اختفت وبعد ما انتهت الحفلة دخل علي الصالة إلا تواجدت فيها أهله لانه من الغلط الكبير ان الرجل يدخل بين النساء

رفع علي الطرحة عن وجه مريم وتفاجئ اول الشي كل هالجمال هذا والحلاوة فيج يا بنت خالتي ما شاء الله عليج
وبدون ارادته حس انه عين قاعدة تراقبه والتفت لدريشه بعيده عن الكوشه وفيها شخص قاعد يطالعه عرف من الا واقف بس نزل راسة بحزن
والمصورة قاعدة تصور وكل شوي تقول لعلي
المصورة: smile pleas
علي: ok
وهذي حالتهم طول التصوير وكان تفكيره كله عند ذاك الشخص الا ما اختفى عن نظرة هاللحظة

ام علي: شفيك علاوي حبيبي؟؟ يالله قوم روح مع مرتك المطعم
علي: ها.. مطعم؟؟ أي إن شاء الله بروح اقرب سيارتي يمه ( وبنظرة سريعة لمريم ابتسم لها وعلى طول طلع من الصالة)

وما حس لنفسه قاعد يركض الكل كان قاعد يضحك على باله انه من فرحته ولكن هو قاعد يركض يشوف من الا صار له مده يطالع فيهم يبي يتأكد انها الشخص الا في باله

وراح عند الدريشة شاف بنت تمشي طالعه من الصالة تقرب منها
حنان ولدموع واضحة بس ما حاولت ما تبينها: مبرووك ابو حسين منك المال ومنها لعيال
علي تقطع قلبة على شكلها: الله يبارك فيج

وراحت حنان واختفت عن عيونه ودمعت عينه لأول مره يحس نفسة ظالم وعرف انها تبادله نفس الشعور: آآآه يا حنان.. خلاص ما اقدر افكر فيج في عهدتي وحده ثانية ( وضرب ايده بقوة على الجدار وما كان يدري انه في طرف ثالث شاف كل الا صار)

يا ترى من يكون هالطرف الثالث؟؟؟

تحياتي

[خادم الحسين]

خخخخ..

لا تعليق.. انزين غششينا او قولي منهو الطرف الثالث؟:D

اخوكم في الله..

[بنت العلا]

ننتظر الجزء الحادي عشر على أحر من الجمر

[بنت العريبي]

بانتظار الجزء الحادي العشر

بفارغ الصبر

[بابا سنفور]

والله تلعبين باعصابنا
تشكرين اختي على المجهود الحلو الى تبذلينه
نتطر باقي قصتج على احر من الجمر

[تقوى القلوب]

اهلا وسهلا

شكرا اعزائي على الردود لا حرمني الله منكم

::الجزء الإحدى عشر::

مرت ليلة الخطوبة بسلام بين قلوب فرحانة وقلبين متألمين وحزينين ومريم الا الفرحة واضحة بوجهه حست انه علي مو معاها أول الشي بس بعد ما راحوا المطعم حست بالسعادة لأنه علي حاول يبعد عنه الأفكار الشيطانية

وصل علي عند باب بيت خالته ام مريم وقبل ما تطلع من السيارة
علي: مريم .. متى امر عليج؟؟
مريم بخجل: ما ادري كيفك؟
علي: الظهر يناسبج؟؟ (يغمز لها) نصلي في المسجد ونتغدى في بيتنا
مريم ابتسمت: اوكي .. باااي
علي: باااي

وراح علي بيتهم وهو يحس بشعور السعادة وبينه وبين نفسه: انتي يا حنان راح تشوفين حياتج بعد جم شهر وتنسيني انا بعد راح اشوف حياتي الله يسعد الجميع ياااارب
-------------------------------------------------------------------
يوم ثاني ام علي جهزت الغذاء لأحلى عروسه وفاء صممت انها تعزم حنان وبعد محاولات فاشلة قالت لها انها بتمرها العصر

اجتمع الكل على الغدى وطبعا فرشوا البسطة (بالبحراني) وعلي ومريم تحت بعض وهدى على يسار مريم وفاء من الطرف الثاني تحت علي والام والابو طبعا تحت بعض

هاجر: هلا بالمعيرس هلا هلا ما ادري شنو يقولون هلا هلا
وفاء: اقول هجور سكتي لا تخربين الاغنية
علي: أييي كملي ما عليج منها
والكل كان يضحك عليهم وشاركهم السوالف

وبعد الغدى كان الكل قاعد يطالع التلفزيون ويشربون الشاي ما عدى علي وأبو علي الا يسولفون
أبو علي: سمعت يا ولدي ولد النهوان مسكوه الشرطة
علي: بل .. لا حول ولا قوة الا بالله ليش ؟؟ شمسوي؟؟
أبوعلي: يقولون انه يكتب على الجدران
علي: هذا حالنا كل يوم وحطوها فوق راس احد.. حتى خالد يقولك ولد جيرانهم مسكوه وشافوه هو بعد فوق السطح بس الحمدلله دخل مع الحمام ههههههههههه
أبوعلي:الله حارسه يا ولدي

وفي العصر راحت وفاء لحنان وكان حالتها تعور القلب وبعد ما استقروا في غرفة حنان
وفاء: الا شخبارج بعد؟؟ ام الصراحة واايد كشخة
حنان: بخير .. ادري إني كشخه احم احم
وفاء: انتي وين رحتي ما شفناج ولا صورتي معانا
حنان: شلون اصور وانا محرمة على علي ها ؟؟
وفاء: صج صج ليش ما قعدتي معانا.. اصلا من دخل علي انتي على طول طلعتي ليش؟؟
حنان: قلت لج محرمة عليه شلون ادخل!!؟
وفاء: تخبين عليّ يعني؟؟
وبنبرة حادة: شنو يعني تبيني اقولج ها؟؟
وفاء تفاجئت من ردة فعل حنان بس سكتت لأنها تدري بالا فيها
حنان نزلت راسها ونزلت دموعها بسخاء وراحت لها وفاء حظنتها

حنان: ليش لما الواحد يحب ما تتحقق أمنيته ويتزوج الشخص الا يحبه؟
وفاء: الزواج قسمة ونصيب حبيبتي
حنان: يا وفاء لا تفهميني غلط ب...
وفاء قاطعتها: ادري فيكم من زمان بس انتي ما توقعتج تبادلينه مثل الشعور
حنان: ابادله مثل الشعور واكثر يا وفاء..(سكتت شوي) من ذاك اليوم الا شفت فيه الأوراق الا كانت في غرفته ومكرفسه ومكتوب فيها اسمي وكلام ما ينفهم له الا بصعوبة في ذاك اليوم تأكدت من حبي له
وفاء: لو كان متقدم لج احد غيره توافقين؟؟
حنان وعلامات الاستفهام: شنو؟؟ شنو هالسؤال الغريب؟؟
وفاء وهي تداري كلامها: لاااا.. ب.. بس سؤال طرى على بالي انتي تعرفيني واايد اخرف ما عليج من كلامي
حنان ابتسمت ولا علقت بس حست انه فيه شي وتركتها في الغرفة وراحت المطبخ تسوي لهم عصير

وفاء تذكرت ذاك اليوم الا كانت قاعده مع علي على الدرج يسولفون
علي: وفاء حبيبتي اسألج سؤال؟؟
وفاء: اكيد
علي بعد تردد: حنان في احد متقدم لها؟؟
وفاء: أي من زمااان عاد اول ما تخرجنا من المدرسة.. ليش؟؟
علي: لا انا اقصد هالفترة في احد متقدم لها؟؟
وفاء: امممم ما ادري الصراحة هي كل شي تقوله لي .. ليش عاد؟؟
علي: كل شي تقوله لج؟! حلو شرايج تسألينها؟؟
وفاء: وانت شنو بتستفيد؟؟
علي: يالله عليج يا وفاء انتي كله اسأله ما تخلصين؟؟
وفاء: أي لازم عيل اسال البنت واسوي لها محكمة وانا ما ادري بشي
علي: يالله عاد اساليها شنو بنقصج
وفاء: ان شاء الله بسألها
ووفاء نست وعرفت سبب زواج علي وحزنة والليلة الخطوبة الا شافتها فيهم يسولفون بس كان في شي محيرها اذا هو يحبها فليش ما تقدم لها واكيد في احد قاله ان متقدم لها شخص

حنان قطعت عليها حبل افكارها
حنان: هلو شفيج تعالي شربي لج عصير
وفاء: شكرا
------------------------------------------------------------------

مرت الايام والاشهر انتهت العطلة والكل ابتدى في الجد ما عدى خالد الا انسحب من الجامعة ويوم الا راح يسحب اوراقه كان معاه حمود لاخر لحظة وهو يقنعه انه ما يسنحب
خالد: انت ما تفهم يعني اقولك ما اقدر يعني يكفيني أأكل اهلي شلون بعد ادرس
حمود: ما عليه حاول الله معاك.. بس لا تترك الجامعة بدونك مو حلوه
خالد: ما اقدر يامحمد ما اقدر اذ.. ما كمل كلامة وانتبه لشخصين ركز اكثر واكثر شاف وفاء مع وااحد واقفة
حمود: شفيك خلّود؟؟
خالد: طالع من واقف هذي وفاء صح؟؟
حمود: أي أي .. الله اكبر واقفه مع وااحد بعد
خالد طالعه بنظرة استحقار: لا تظن في الناس.. انت ركز اكثر مو كأنه قاعد يتحرش فيها؟؟؟
حمود لبس نظارته: ايييييي صج هالزفت

خالد ما عطل وراح ركيض للمكان الا واقفه فيه وفاء ووراه حمود
خالد:لو سمحت يالاخو امر شبغيت؟؟ وفاء تمت طالع في خالد بأستغراب
الشاب: وانت شعليك؟؟
خالد وجه كلامه لوفاء: شنو يبي؟؟
وفاء: ما ادري فيه صار له ساعه يقول لي عطيني الرقم
خالد: اها.. اقول اخوي روح بالطيب احسن لك
الشاب بصراخ: تدلي امك وين روح لها؟؟
خالد ما تحمل اكثر ما يحب احد يغلط على امه وتم يضرب فيه ضرب لين شبع مسكه من قميصه: اذا مره ثانية شفتك واقف مع احد من خواتي اكسر لك عظام فااهم
وحنان ونوراء شافوا لهواش وقربوا من الهوشة وشافوا وفاء واقفة سحبتها نوراء
نوراء: شصاير وفوي؟؟
وفاء: بعدين اقول لج

شكرت وفاء خالد الا كانت ايده متألمه وبسرعة راحت عنهم والشاب الا كان يتحرش هرب من يد خالد

حنان: الااااااااااي فاتني الكاراتي
وفاء: سكتي والا يسلمج
حنان: شعنده البطل خالد يضرب لصبي يازعم هو الا ما يسوي هالحركات
نوراء: مسكين هذا جزاه يساعد رفيجتج وتقولين عنه جذي بالعكس انا اشوفه واايد متغير
حنان: أي والله.. الله يهديه .. وفااء شفيج ساكته ؟؟
وفاء الا كانت تفكر بتصرف خالد: لا ولا شي

ارائكم وتوقعاتكم وانتقادكم...

تحياتي

[بابا سنفور]

تشكرين اختي والقصه كل يوم تصير احلى او احلى
نطر الحلقه الجايه على احر من الجمر

[شهد]

السلام عليكم ورحمة الله....

عزيزتي تقوى القلوب...

قصة جميلة لطيفة تمزت بطابع سحري جميل..
بصراحة أولشي كنت مترددة أقرأ القصة لأني ما أحب القصص الطويلة..
لكني يوم قريتها حبيت أعرف نهايتها ...
بصراحة عندش مهارات وقدرات على كتابة القصص..
والله يخليش لينا يارب..
وبالتوفيييييييق وننتظر منكِ الجزء الجديد بسرعة...

سلمت لنا هذهِ الانامل ووفقكِ الله...

...
اختكِ..
قبس

[تقوى القلوب]

اخي بابا سنفور تواجدك الدائم هو الاحلى

اختي العزيزة قبس بل لوي كلكم مترددين تدخلون بس ما بطول ان شاء الله .. احم احم القدرات ان وجدت من الله و من ثم تشجيعكم لي

تحياتي

[تقوى القلوب]

السلام عليكم ورحمة الله...

تحية عطرة،،،


::الجزء الثاني عشر::

خالد بعد ضرب الشاب طلع من الجامعة وحمود وراه بس ما لحق عليه لانه سريع في خطواته والغضب واضح من قسمات وجهة النحيل ركب سيارته وطيران لأي مكان تروح فيه السيارة وطول هالوقت كان يفكر فيها (تعرفونها له؟؟) وقف بسيارته بألم فضيع في يده حاول يبتعد عن الطريق ووقف عند احد الارصفة حاول انه يتمالك الالم بس كان الالم اقوى منه وقف له احد المارين بالشارع والرجال كان كبير شوي
الرجال طرق دريشة السيارة: سلام عليكم
خالد: وعليكم السلام
الرجال: عسى ما شر ياولدي ؟؟
خالد: ما شر بس مره وحده يدي ألمتي بشكل فضيع
الرجال: قوم ياولدي اوصلك المستشفى
خالد:لالا ما يحتاج البيت.. قريب خلاص
الرجال: عيل قوم اوصلك البيت
خالد ما اعترض لانه الالم اقوى من انه يرفض
-------------------------------------------------------------------
علي كان في بيت خالته مع مريم الا تعود عليها وصارت جزء لاتجزء منه
علي يتدلع: يالله عاد مريوم حبيبتي لقمة وحده بس(يأشر بإيده) وحده بس..
مريم بزعل: طول الغدى وانه اعطيك خلاص
علي: والله اخر وحده
مريم عطته العيش بإيدها طبعاً:بالعافية
علي عض ايد مريم بقوة وصرخت مريم... علي: تستاهلين عشان مره ثانية ما تعانديني هههههههه
مريم: لكن اراويك بتشوف!!
علي يضحك: شنو بشوف؟؟.. هالكلمة حفظناها
بعد ما خلصوا من الغدى استأذن علي من مريم عشان يرجع لشغل

وصل على الشغل واستغرب عدم وجود خالد الا كان دائما يتواجد قبله اليوم الصبح راح الجامعة وكان مأكد عليه انه بيجي الشغل في العصر
علي يفكر: اممم اتصل فيه اشوف شنو فيه (قبل لا يتصل فيه رن تلفونه وكان المتصل خالد)
علي: هلا هلا حبيبي.. القلوب عند بعض لو انتظرت شوي جان اتصلت فيك
خالد: شوي شوي عاد كله ورى بعض ؟؟ المهم ابو حسين ما بقدر اليوم اجي الشغل اوكي؟
علي: ها عسى ما شر شفيك؟؟
خالد: ما ادري شفيها يدي تألمني شوي
علي بمزح: عيارة والا من صدقك ؟؟
خالد اختنق صوته من الالم: متى جذبت عليك ياعلي؟؟
علي تخوف: الحين بمرك نروح المستشفى.. مع السلامة

علي ما انتظر جواب خالد وعلى طول طلع من الورشة وطيران لبيت خالد وراحوا المستشفى واخذوا اشعه لليد وعطوه مسكن للالم وبعد دقايق دخلوا عند الدكتور
علي وخالد: السلام عليكم
الدكتور: وعليكم السلام
علي: ها دكتور بشر!
الدكتور: لا ما عليه شر بس كسر بسيط
علي تفاجئ كسر وهم قبل لايوصلون المستشفى سأل خالد عن الالم قال له انه رافع شي ثقيل فما صدق بس سكت ولاتكلم الا بعد ما اخذوا المسكنات وجبروا يده
علي: يعني ما بتقول لي من شنو هالكسر؟؟
خالد ما حب يجذب اكثر: يا اخي لازم اقولك يعني؟؟ أي متهاوش زين
علي عصب: وانت يعني ما تجوز كله هواش وبس متى بتفهم؟؟
خالد: لا عيل اسكت عنه يلعب بعرض الناس واسكت اذا يرضيك ما يرضيني
علي: تفاهم معاه مو تطقاققون مثل اليهال
خالد في نفسة والله اذا ترضى يسوون فيها شي انا اقص رقابهم

والتزموا بالصمت لين ما وصل خالد بيتهم وعلي راح بيتهم يرتاح

استقبلت هاجر اخوها غير عن كل مره
هاجر: هلا اخوي حبيبي هلا بولد امي وابوي هلا
علي يطالع هاجر باستغراب: شعندج اليوم؟
هاجر: ولا شي اخوي خاطري فيه فيها شي؟؟
علي: اييي
سكتت هاجر شوي وردت تكلمت:علاوي شرايك اليوم نطلع؟
علي: قولي من اول اشوف استقبال حار وما ادري شنو روحي ذاكري احسن لج
هاجر تتوسل: يالله عاد علاوي تمللت من البيت نطلع نشم هوى على الطاير ونرجع
علي وهو يتمدد على الكرسي الا في الصاله:يصير خير ليلة الجمعة
هاجر برطمت وقامت راحت حجرتها

بس علي كسرت خاطرة اخته كان يناحسها كان بروح يراضي بس هو كان يبي يسوي لها مفاجئة لانه الليلة عيد ميلادها فتصل لمريم يذكرها
علي:الووو..هلا حبيبتي شلونج؟
مريم: هلا بيك عمري بخير.. شخبارك انت؟؟
علي: بخير.. شخبار ايدج؟؟
مريم تذكرت انها زعلانه: ايي للحين تألمني
علي: هههههههههههه سامحيني عمري كنت امزح معاج
مريم: لاعاد يابو عيالي امزح على كيفك
علي: احم شكرا على التصريح يا ام عيالي هههههههههههههه على العموم لاتنسين ها الساعه 9 انتي جاهزة اوكي ؟؟
مريم: ان شاء الله
علي: يالله مع السلامة<