السلام عليكم ورحمة الله..
الجمهور هني معصب على القصة اني معصبة على الجامعة ال اسكت احسن
دكاترة ما تعرف تشرح
ومسامحه للكل وبالاخص بابا سنفور شفت اليوم ردك الصبح واني في الجامعة تمنيت
اني حاملة الدسك وياي عشان احط اليكم القصة بس ماعليه سامحوني وتحملوني
-----------------------------------------------------------------------------------
::الجزء الحادي والعشرين::
خالد متوتر اليوم والشيخ كل شوي يهدي فيه وعلي يهدي فيه وشوية يطفشه ويضحكون عليه الشباب
خالد: والله حرام تسوي جذي هذا وانا زوج اختك وصديقك بعد
علي: هههههههههههه انا شسوي قلت لك يمكن تستجن اليوم ماقلت..بهمس بأذن خالد.. ترى اختي جيكره قصدي قمرها
خالد:هههههههههه لا والله ما اسمح لك..لكن ما علية اراويك بقول لها
جعفر قاعد يتريق وهو ياكل: ولا اله الا الله كلكوووووش وعاشوا المعاريس عاشوا ولا اله الا الله
قام الكل يصفق وياه ورتبشت الزنزانة بصراخهم وفرحتهم.. دخل عليهم الشرطي
الشرطي: خالد تعال.. وانتوا سكتوا يالله
منصور: اسكت أنت.. ولا اله إلا الله كملوا كملوا
الفرحة عامرة الزنزانة الكل جهز بعض الحلويات الموجوده عندهم وبعضهم نظم فرقة للأناشيد
خالد وصل المحكمة ودخل وتلاقت عيونه بعيون وفاء تغيرت ملامح وجهها الحين واجد ضعيفة
قعد أمام الضابط وعلى اليسار من جهة ثانية قعدت وفاء
القاضي: وفاء حسن النجار.. تقبلين الزواج بخالد المحكوم عليه 6 سنين؟؟
وفاء بفخر قالت كلمتها: نعم
خالد ابتسم لإصرارها وزاد حبه لها..بعد ما خلصت إجراءات الزواج.. باركت له أمه وحظنته: مبروك حبيبي.. عساها تكون خير عليك بعدهم كلهم
خالد: الله يبارك فيج يمه.. ولا تعبين نفسج واجد ترى مرتاحين احنى
امه تمسح دمعتها: ان شاء الله ياحبيبي
خلود: مبرووك خالد والف الف مبروك
خالد: الله يبارك فيج حبيبتي.. خلود تحملي بالوالدة خليها بعيونج امانة
خلود: ان شاء الله
راح خالد لعمته ام علي وباسها على راسها.. ام علي: الف مبروك يا ولدي
خالد: الله يبارك في حياتج
وبالمثل بارك له أبوعلي وفاء الا كانت واقفة منزله راسها.. مسك ايدها وباسها على جبنيها: مبروك يا ام وليد
وفاء دمعت عيونها: الله يبارك في حياتك
خالد مسح دمعتها باصبعه: ما ابي اشوف هالدموع الغالية
وفاء: ان شاء الله
طلب أبوعلي من القاضي إن يتركهم لمده نصف ساعة يتكلمون فيها مع بعض وما اعترض القاضي لهذا الشي
دخلهم الشرطي غرفة فيها كرسيين وطاولة وريحتها كلها سجائر
خالد: تفضلي عمري
وفاء: شكرا..وجهها تغير من الريحه الكريه
خالد:هههههه شفيج ويهج جذي ترى هذي ريحة البخور هههههه
وفاء:هههههههه الظاهر جذي
خالد تم يطالع في ضحكة وفاء: ليش سكتي؟؟ تدرين اكثر شي يعجبني فيج عيونج العسلية وضحكتج
وفاء بخجل: وانت متى شفت ضحكتي؟؟ آه منك ما تجوز من سوالفك ها
خالد: لاوالله.. بس اذكر من زمان في الجامعة على ايام الطيش واقف عند السكشن سمعت صوت بنت تضحك قعدت اسمع من الباب مو قصدي وفتحته شوي شفتج قاعدة فوق الطاولة وتسولفين وتضحكين مع رفيجتج مريم والحمدلله ماانتبهت لي مريم ولا فوق هذا كنتي تنشدين اناشيد روعة
وفاء فتحت عيونها: صج؟؟ وليش قاعد تسمع ها
خالد: ههههه أي صج.. بعد شسوي فيج تغنين لنا والناس في عز المراجعة هههه
وفاء:ههههههه انزين بقولك انت ليش ذاك اليوم ضربت الصبي الا كان يتحرش فيني؟؟ وانت اصلا ما تواطني بعيشة الله
خالد: ليش بعد يعني اشوفه يسوي فيج جذي واسكت ها لو بأيدي قتلته ومن قال اني ما احبج بالعكس انتي بتصرفاتج كنتي تدخلين قلبي بسرعة
وفاء تدارك الخجل وكأنها ما سمعت اخر جملة: هههههههه لا الصراحة ذاك اليوم تغيرت نظرتي لك 180 درجة
خالد: احم احم اشكر شعورج
كانت سوالفهم كلها عن الماضي وذكرياته الحلوة وقطع عليهم سوالفهم الشرطي يخبرهم بأنتهاء الوقت
وفاء وقفت عشان تودع خالد والشرطي من وراه ماسك ذراعه
خالد مسك يد وفاء بأيده ثنتينهم وكأنه يدفئها وقربها من فمه وقبلها ونظراته كانت متوجهة لعيون وفاء: احبج وفاء لاتنسيني
وفاء ما تحملت اكثر وكأنها طفلة يسلبون منها لعبتها حظنت خالد: وانا بعد احبك لا تخليني بروحي لاتخليهم ياخذونك مني
دمعت عيون خالد ومسحها بسرعة وابعد وفاء من حظنه ومسح دمعتها وباس جبنيها: كلها كم سنة وانا عندج لاتنسيني من الدعاء.. وخلج قوية في هالمواقف انا اعرف وفاء بقوتها وصلابتها واتمنى اشوفها دائما جذي..ولاتنسين الرسائل
سحبه الشرطي وطلع من الغرفة وعيون خالد تودع وفاء وابتسامة توصل لها احلى الوداع وقبلة طرشها على الهواء ابتسمت وفاء وكأنها تطبق الا قاله لها خالد بأنها تكون قوية امام الظلم
وصل خالد الممر الا يدخلهم الزنزانة وسمع صوت صراخ الشباب وفرحتهم وكل واحد فيهم يقول لثاني ان خالد وصل تجمع الكل عند بداية الممر وسوى له احلى زفه
علي راح له وبين الأحضان: ألف ألف مبرووك حبيبي منك المال ومنها العيال
دمعت عيون خالد وهو بحظن علي: شفت دمعتها ياعلي كنت اقولها كوني قوية وانا تهدم كياني بشوفة دمعتها
علي: لا تقول جذي وفاء قوية وانت مثلها وافرح تراها اكيد فرحانة وتسمع كلامك
توالت التبريكات من شخص لثاني وقعدوا ينشدون اناشيدهم المعتادة وبصوت واحد
حسن تكلم مع جعفر وبهمس: في واحد في الزنزانة الأخيرة الظاهر جديد
جعفر: قوم نروح له اكيد يحس بالوحشة
سيدعلي: وين رايحين؟؟
حسن: بجي تعال لا تسأل
سيدعلي: وانت كله جذي تسد نفسي.. مابروح زين
حسن: افا سيدنا ما نمزح وياك يعني قوم قوم بلا دلع
دخلوا الثلاثة الزنزانة وشافوا الشخص قاعد بروحه ومغطي وجهة بين رجلينه
حسن مسك ذراعه: سلام عليكم
رفع راسه وعيونه متورمه من الصياح: وعليكم السلام
سيد علي: شلونك؟؟
....: الحمدلله بخير
جعفر: اليوم عندنا عرس تعال ويانا وان شاء الله بتكون واحد منه وفينا وعشان تتعرف على الجماعة
.....: ان شاء الله
رجعوا لزنزانة وعند باب الزنزانة وقف الشخص وانتبه له خالد وعلى طول وقف لا إراديا ونفس الشي علي وقف.. راح خالد بسرعة لعند محمد
خالد: هلا عزيزي.. شلون انت هني.. شصاير؟؟
محمد: هلا بيك.. بعدين بقولك
تعرف محمد على الكل وقال للكل عن السبب
رضا: شنو هذي هالمره هذي مرة عم؟؟ صج ماعندها قلب
منصور يعرف محمد من زمان: هذي مسكينة تخبر الشرطة عشان تترزق الله وتحصل لها كم فلس.. بسبتها دخل اخوي السجن
علي: عندك اخوا مسجون بعد؟؟
منصور: أي مسجون في الحوض الجاف
علي: الله يساعدهم الصراحة
محمد: الا في الحوض الجاف كلهم مرضى وجسمهم ملتهب من الحساسية انا اسبوع واحد ما تحملت
كانت سوالفهم عن الاعتقالات وكل واحد فيهم يتذكر الماضي وشنو سمع من أخبار عن الديرة
---------------------------------------------------------------------------
مرت اشهر وانتهى العام الدراسي وفاء نجحت في الجامعة باقي سنة وتحصل البكالوريوس وهاجر ارتفع معدلها وعندها طموح انها تدخل الجامعة ولازم يكون عندها واسطات عشان تدخل الجامعة بس هي اعتمدت على الله وهذي واسطته واكبر واسطة ومريم مثل الشي حبت الدراسة وكانت تحاول انها ترفع معدلها قد ما تقدر والحمدلله وصلت لطموحها
وفاء في الصالة مع امها ومريم وهاجر: يمه شرايج نعزم ام خالد على الغدى؟؟
ام علي: والله من زمان واني اقول لج وانتي تقولين تستحين منها اتصلي فيها وخبريها باجر الغدى في بيتنا
مريم: أي والله خالتي من زمان ما اكلنا اكل معازيم
هاجر: بااال عليج ام شليخ .. ياحبج للمعازيم بتفقرينا انتي وذاك الأسبوع حنان عازمين حنان
مريم: ذاك الاسبوع يعني صار لنا تقريبا..لحظة بحسب ها.. 144 ساعة و56 ثانية..هههههههههههههههههه
هاجر: ههههههههههههههه الله يساعدج
وفاء: سكتوا شوي ما اسمع منكم... الووو خلود شلونج؟؟
خلود: هلا والله بخير وانتي شلونج يالقاطعة
وفاء: بخير انا والا انتي القاطعة اقول عطيني عمتي حبيبتي بعد عمري عمتي
خلود: واني ما تبيني يعني؟؟ عمتج مو هني قولي لي وبوصل لها الكلام
وفاء: عطيني عمتي اسمع حسها تناديج يالله وحره مابقولج
خلود: ولو قلت لج قولي لي عشان خاطر بوليد؟؟
وفاء: بهذي غلبتيني.. بس بعد ما بقول
خلود: ما اقدر على الحب.. لحظة ها
ام خالد: هلا والله ببنيتي وينج ما تنشافين
وفاء: شسوي عمتي الجامعة ما تخلص
ام خالد: الله يوفقج يابعدعمري.. ها شفيج عمري تآمريني على شي؟
وفاء: ما يأمر عليج عدو.. عمتي باجر معزومة على الغدى في بيتنا ولا تقولين لا عشان خاطري وخاطر الا تحبينهم
ام خالد: يايمه لا تعبين امج
وفاء: لاتعب ولاشي بالعكس تعبكم راحة.. باجر بمرج وباخذج اوكي عمتي؟؟
ام خالد: الا يريحج.. سلمي على امج وخواتج
وفاء: الله يسلمج.. يالله مع السلامة
ام خالد: الله يسلمج
:ranting2:
