لم ارى اي رد لكن سأنزل الاجزاء
:: .. الجــزء الـثالث .. ::
خامس يوم لهم .. اللي هو الخميس .. ناووين يقضونه كله بالتسوقّ بالشانزليزي ..
بس لالحين كلهم نايمين الا ديمه وانوار اللي قاموا مبجر عشان يتريقون بالفندق تحت .. ابوهم سمحلهم يتريقون بالفندق نفسه بس ما يطلعون .. حتى لو سوبرماركت اللي عند الفندق .. مايعتبون باب الفندق الا كلهم مع بعض ..
انوار وديمه الحين بالغرفه يمشون بأطراف اصابعهم مايبون ميشوو وحمود يقومون ..
انوار بهمس : بعد شحقه تحوسين ؟ يلا امشي
ديمه : باخذ فوفو معاي اخاف يقوم ويأذيهم
انوار : اففففف مايخالف قفصه صغير يلا اخذيه .. بس تحركي
كان قفص فوفو فضي دائري وقاعدته دائريه وكان صغير شوي بس راااقي .. يعني عادي ينشال معاها بأي مكان ..
نزلوا ودشت ديمه قبل انوار وقعدوا بالطاوله .. ماشافت احد الا واحد مع مرته شكلهم كبار والثاني مع رفيجه .. وهاااااااديين ..
ديمه : انزين انتِ اسكتي لا تفضحينا بصوتج الناس هدوء
انوار : اوكي يلا شراح تطلبين ؟
ديمه : اممممم مادري خليه يجيب المنيو
انوار : أي صج ليش؟؟ كاهو البوفيه مفتوح
ديمه سكتت وبلعت لسانها لان طاولتهم بالنص وشافت مشعل طالع من الحمام وجات عينه بعينها هي تمت تطالعه بعيون مفتوحه وبلعت ريجها .. هو كل اللي سواه ابتسم لها ..
ديمه : قومي قومي
انوار: لييييييييش
ديمه : بعدين تعرفين
انوارمستغربه : ليش عاد ؟ ؟
ديمه : وبعدين يعني!!؟ امشي بسرعه
انوارطالعت المكان اللي كانت تشوفه ديمه قبل شوي وخلاها تنصدم وغيرت رأييها ..
انوار : لالالالا معقــوله !! حييييييل يشبــه ........ وسكتت
ديمه حطت ايدها على وجهها تبي تبعد هالوجه من خيالها
انوار حستّ بديمة : الله يرحمه خلاص ولايهمج خلنا نقـوم ..
طلبوا سفري وخذت انوار الطلب وراحو فوق ..
اللي انصدم من هالسالفه كـلها مشعـل .. ماعرف ليش هي سوتّ جذي ؟؟
وبدا يشكك بنفسه بس هو ما سوى شي يضايقهم ولو بنات ديرته لايمكن يرضى عليهم ..
بس شغلته هالسالفه شوي .. مع انه كـل ما شاف البنت اللي قبل شوي بس وده يوقف ويطالعها .. ماعرف يفسر هالرغبات بس تركها شاف انها مالها اهميه .. بس ما انكر ان البنت من اسبوع شاغله باله لانه ما يشوفها الا اذا كانت واقفه عند محل الورد او قاعده مع الطير اللي يموت ويعرف شسالفته .. حس انها هـــــاديه حيل .. ومافي شي بالدنيا منعه من انه يبتسم لها يوم شافها .. قباله وبعد ما خلص راح غرفته ولبس ملابسه الرياضيه وراح التمرين .. لان وراهم مباره باجر تجريبيه لان الدوري الاصلي بيبدا بعد اسبوعين..
---
على الساعه 12الظهر طلعوا من الفندق بعد ما رتبوا غرفتهم والمطبخ والحوسه كلها خطوتين الا هم بشارع الشانزلزي المشهــور .. ومن وصلوا خلاص نسوا عمرهم البنات واتفقوا انهم يتلاقهون عند كوفي Paul على الساعه 5 .. وزين اذا يمديهم يتمشون ويتشرون .. البنات كانوا مع بعض انوار وديمه اما ميشو مع امها ومحمد مع ابوه .. بومحمد صادف جم واحد من ربعه وقعد معاهم .. وشي طبيعي شافوا ناس مشهورين على المستوى الفني والرياضي والاعلامي .. وهم ماشين .. شوي الا شافوا اعلانات حفله محمد عبده ..
انوار : ونااااااااااسه محمد عبده هني
ديمه : واذا يعني ؟
انوار: عفيه كلمي ابوي خلنا نحضر ..
ديمه : انا احضر حفله ؟؟؟ لا ياحبيبتي ماحب هالسوالف والخرابيط وبعدين عيب عليج
انوار: ليش ؟ عادي بس يغني
ديمه : هالحفله متى بتبدا متى بتخلص ؟؟ تبين تردين الفندق الفجر ان شاء الله ؟؟؟؟
انوار: لا اكيد مو الفجر عندهم وقت ثاني اكيد
ديمه : انوار انتِ متى بتتركين منج الاغاني والخرابيط ؟
انوار: شسويت انا لحين لا تكبرين السالفه وخلاص انسي خلينا نتمشى
ديمه : يكون احسن مرات عقلج يقفل وتفكرين مثل الجهال
انوار : ريحي ملائكتج ابوي 100% ماراح يوافق ان نروح حفله
ديمه : ههههههههههه الحمدلله وفرتي على عمرج عناء الفشله
انوار: ياسلالالالالالام وقفي وقفي ديوم
ديمه وقفت ولفت وراها
انوار: محل كبيررررررررر كله مكياج وعطورات
ديمه : اللهم طولك ياروح
انوار: عااااد لاتصيرين جذي ترانا نتمشى يعني فجي هالكشره
ديمه ابتسمت : اوكي ادخلي
ودشوا المحل صج داهيه ماشافو اخره .. بس اللي استانست عليه انوار انهم جايبين خبراء تجميل يحطون مكياج للعارضات او أي احد ببلاش العرض لاسبوع فقط ..
انوار: بحطططططططط بشوف شكلي بالمكياج
ديمه عصبت : انوار انتِ ليش صايره جاهل ؟
انوار: لييييييييييش ياربي
ديمه : يعني انتِ بعقلج بتصبغين وجهج وتطلعين قدام الناس ؟
انوار: أي شفيها بجرب مره وحده بس بمسحه بالفندق
ديمه : وانتِ ماتخافين على نفسج يعني ؟ والا ما تستحين ؟
انوار: ثنيناتهم هههههههههههههه بس عفيه بحط بس بمسحه هني بالمحل
ديمه : يوييييييييييلج والله اقول خلنا ندش داخل اشتري مكياج بس مو تحطينه وتخرعين الناس
انوار: ههههههههههههههه انزين يمى منج
وخلصوا من السوق وهم رادين .. الفندق .. المغربي اللي بالرسبشن نادى بومحمد ..
الموظف: ابو محمد انا قلت لك من اول ما حجزت بالهوتيل ان اقامتك متوفره لمده اسبوع فقط
بومحمد تذكــر : اييي صح بس توه ماخلص الاسبوع السبت بيخلص
الموظف : اعلـم ذلك ولكن الفنادق في باريس كلها فل فلن تجد الا خارج باريس يعني تبعد من هنا ساعه او ساعتين بالتاكسي
بومحمد : لي هالدرجه ؟
الموظف : أي نعم ولو في مجـال لا سمحت لكم بالمكوث اكثر من اسبوع على الرحب والسعه ولكن هذا الحاصل ..
بومحمد : انزين دام السالفه جذي ابيك تضبط لي سفره للبندقيه
الموظف : فكره ممتازه .. ولكن تريدها بالمترو ام على الطائره ؟
بومحمد : طائره اريح
الموظف قعد يتصل بالسفريات اللي متعامل معاها الفندق .. وقال لبو محمد يستريح
ام محمد : ها بومحمد شصار ؟
بومحمد : لا بيضبط لنا سفره لإيطاليا
ام محمد : ليش باريس تهبل ما شبعنا منها
بومحمد : مافي حجز فنادق فل شسوي ؟
ام محمد : يلا منها نشوف ايطاليا
بومحمد : خلاص انتِ اخذي العيال وروحوا فوق عشر دقايق وجايكم
ام محمد : انزين معاك كرت الباب ؟
بومحمد : أي معاي
ام محمد : بس ترى ديمه راحت السوبرماركت طرشتها تجيب لي ماي صحه
بومحمد : خلاص بنطرها
شوي الا نادى الموظف بومحمد ..
الموظف : للأسف الطائره لن تفيدك لان الحجوزات لبعد اسبوعين لن استطيع العثور على حجز للاسبوع القادم ..
بومحمد : يعني شلون ؟
الموظف : والله انا اقولك اركب ميترو وتوكل على ربك
بومحمد : بس المدام ماتحب الميترو
الموظف : ماراح تحس فيها ابد .. لانها بيكون سريع ومافيه محطات
بومحمد : دام جذي اوكي احجز لنا فيه واحجز لنا فندق هناك ونبي تاكسي الفندق يوصلنا من المطار
الموظف : تحب احجز لك بفرعنا اللي هناك ؟
بومحمد : أي مافي مانع
رتب بومحمد شغله على انه يوم السبت بيروح البندقيه مع اهله ..
نطرّ بومحمد ديمه شوي الا شاف ناصر ومشعل طالعين من الانصنصير .. سلموا عليه وقعدوا معاه ..
اللوبي كان كله قزاز على الشارع .. وديمه كانت شايله جيس كبير فيه بطول ماي كبيره .. وقفت على باب الفندق طقت الرقم مو راضي يفتح
ديمه : لحووووووووول
وكانت ماسكه الجيس بيد وتعدل شيلتها بيد ثانيه .. تلعوزت مع هالماي .. ومشعل كان يشوفها وبقلبه وده يضحككككك على شكلها بس مع هذا كسرت خاطره وده يشيل هالماي عنها .. بعدين تذكرت انهم كل خميس يغيرون رقم الباب الرئيسي .. وضغطت زرّ نبه الرسبشن وفتحوا لها الباب
بومحمد شافها وابتسم : ما قلنالج ان الرقم تغير ؟
ديمه : ماقلتوا لي .. دايما انا اخر من يعلم ..
بومحمد : مره ثانيه احفظيه كلها يوم ونروح
ديمه : وين ؟
بومحمد : باجر بقولكم
ديمه : الله يستر لا تردنا الكويت
بومحمد : هههههههههههه لا تو الناس لاتحاتين
ديمه : أي اشوى
وصعدوا وراحوا غرفهم ..
----
باللوبي .. ناصر ومشعل ..
ناصر : مابغيتوا تفوزون !
مشعل : مافرحت بالفوز كثر ما فرحت انه بيعطينا اجازه ثلاث ايام من الجمعه يقول صرتوا تمام
ناصر يتحلطم: أي مو فريقنا !! اذامسك الكره خلاص مايعطي رفيقه صارت ملكه مدري شاريها بفلوس ابوه !!
مشعـل : ههههههههه حّره ماورراي تمرين
ناصر : لا تحرق دمي
مشعل : هههههههههههههههه احلى شي اشوفك معصب ياخي ملامحك روعه وانت ماد بوزك شبرين
ناصر: المهم تراي ميت جـوع
مشعــل كأنه تذكر شي وضاق خلقه
ناصر: منت قايم تراي والله على لحم بطني من الغدى
مشعـل : بومحمد بيروح السبت
ناصر : الله يحفظه ان شاء الله الا مشعل وراك ماتروح معه عندك اجازه
مشعـل سرحـان : هلا ؟
ناصر : لحووول الولد مهو بطبيعي اللي ماخذ عقلك يتهنى به ..
مشعـل : اقول خلنا نروح نتعشى خل عنك الهذره الزايده
سايره ناصر وطلعوا مع بعض راحوا لمطعم مصري مشهور بالبيتزا ناصر طلب بيتزا ومشعـل عشقه اللازانيا ..
وهم ياكلون ناصر يسولف ..
ناصر : اتصدق يومين ما كلمت امي اكيد تلقاها شابه علي
مشعـل سرحان بالازانيا وفكره بعيد ..
ناصر هد الشوكه : مايصير كذا واللي يرحم لي والديك تراك متغير صارلك كم يوم
مشعل : هلالالالا ناصر شفيك تصارخ ؟
ناصر : لا انا مصّر اعرف سالفتك
مشعـل :ياخوي كمل اكلك ذابحني جوعان وجوعان يلا اكل
ناصر : شوف انت بتقول السالفه والا بيجيك شي ما شفته
مشعـل: انزين هـدّ اعصابك وبعد العشى يصير خير ..
ناصر طنش مشعل وقعد ياكل وبعد ماخلصوا ..
ناصر : بتقول ؟
مشعـل : شوف اسلوب شوي وتكفخني هذا مابيه
ناصر : هههههههههههههه اقول اخلص هات اللي عندك
مشعـل : افكر بهلي ودي خلال هالثلاث ايام اسافر
ناصر : اللحين هذا اللي شاغلك !
مشعـل : أي
ناصر: انا قلت الرجال يحب والا وراه سالفه
مشعـل يضحك : انا وجه حب ؟؟؟؟
ناصر : قلنا يعني جاك طشار مني شوي
مشعـل : ليش انت تحب ؟
ناصر : اعنف قصه حب !
مشعـل : احلللللللف منت هين
ناصر : مشعل لاتستهين بالحب ياخي صدق شي جميل بس ساعات يعذب
مشعــل : الله اثاريك شاعر وانا مادري
ناصر يضحك : لا تستهين بخويك
مشعــل : انا من رافجتك وداري انك متعدد المواهب ..
ناصر: هههههههههههه
مشعــل لف السـالفه هو اصلا ماوده بالوقت الحالي يردّ الكويت بس يبي يتهرب من السالفه اللي كان يفكر فيها هي ديمه .. ولو انه مايعرف اسمها حتى بس كان وجودها يفرض عليه اشياء واجد .. يعني اذا كانت هي بمكان ماوده يطلع منه .. مع انها ما شافته عين بعين الا مره وحده وكانت ردت فعلها غريبه نوعا ما لمشعـل .. ماقدر يعرف شيسمي شعوره تجاها بس اللي يعرفه انه بيفقدهــا .. اخر شي حط فباله انه ما يفكر فيها زياده عن اللزوم لانها مثل سحابه صيف بتمر وتعدي ..
وفي الغرفه ..
ديمه لابسه بجامتها صفرا وفيها وروود وقاعده تحط الاكل لفوفو وتحط له الماي .. وتطـالعه لونه ابيض والقفص فضلي وقعدت تتأمل فيه شوي شوي لين سرحت بأفكـارها باليوم اللي جابه عمها لها وحست ان اللون الابيض يدل على قلب عمها .. وقعدت ديمه تسولف على فوفو وتقوله عن السوق ومنو شافت
ديمه : سوري فوفو صرت اطلع اكثر من خمس ساعات ولا اخذك معاي بس شسوي انا رايحه السوق ومابيك تتبهذل .. لاتعصب زين اخر مره اطلع ومااخذك .. واذا بطلع بشغل لك التلفزيون
.. وطبعـا ديمه مندمجه بالسوالف الا يطق الجرس
ديمه : منووو ؟؟
انوار : فجيييييي الباااااااااااااب
ديمه : انزين
انواردخلت ووجهها ينبأ انها عارفه خبر ومو قادره تكتمه
ديمه : شعندج ؟
انوار: امي وابوي باجر بيودونا الاكواااااااااا بارك
ديمه : هذي احواض سباحه مو ؟
انوار : اييييييييي
ديمه : بس ليش مستانسه احنا ماراح نتسبح
انوار: ادررررررري يالخبله فتحي مخج معاي
ديمه : طالت وشمخت لا تقولين يالخبله !!
انوار : انزين يالمودمازيل .. تدرين اكووووا مو بس فيه احواض سباحه لالالالا عبالج مثل حقنا اللي بالكويت
ديمه : الله واكبر اللحين اكوووووابارك اللي بالكويت صار ما يعجبج
انوار: انتِ ليش ملقوفه جايتج بالكلام
ديمه : يمى منج كل صغيره وكبيره تحت راسج
انوار : الله يسلمج اكووا فيه مطاااااااااعم وفيه سينمااااااا وفيه احواض سباحه وفيه صالات رياضه وفيه كل شي
ديمه : اممممممم عرض مغري
انوار: يعني نقط الجهال بالاحواض واحنا نروح السينما ياذكيه
ديمه : انزين شدراج عنه
انوار: سمعت ابوي يقول بنروح اكوابارك قلت وانا نازله اجيب لي كولا من الماكينه خلني اسأل الرسبشن
ديمه بعطش : كااااان جبتي لي كولا معاج يالبخيله
انوار: ماعندي خرده
ديمه : عادي اخردي عند الرسبشن يلا تجيبين لي ؟
انوار ابتسمت شكلها عندها فكره احلى: اممممممم شرايج !
ديمه : بشنوووو
انوار: ننزل انا وياج تحت انتِ تشترين كولا وانا اكلم مريوم بنت خالتي ترى عندي بطاقه توني شاريه
ديمه : اما عليج خطط بس ما تتوقعين الوقت متأخر ؟
انوار طالعت ساعتها :تو الناس الساعه 10.30
ديمه : يعني عادي ننزل
انوار: يلالالالا امشي اصلا في كبينه حق التلفون عشان تاخذين راحتج
ديمه : يمى منج شلون عرفتي كل هالاشياء ؟
انوار: حبيبتي من سأل ما ضاع يلا البسي شيلتج والحقيني
ديمه : آخذ فوفو ؟
انوارعصبببببببت : وبعدين معاااااااااه لو سمحتي زين وافقنا انج تجيبينه معاج من الكويت تجين تطلعينه كل مكان شنو هذا وبعدين اقصااها لوبي يعني ماراح نسافر
ديمه حزّ بخاطرها بس فضلت الصمت ....وركـزّت نظرها على ديكورات الغرفه الخشب والابجورات ..
انوار لاحظت انها انفعلت حيل تندمت
انوار بنبره واطيه مبتسمه : انا اللي باخذه هالمره وبنزله بدالج اوكي ؟
ابتسمت ديمه ابتسامه باهته : انزلي انا لاحقتج
وبعد مانزلت ديمه مالقت انوار لانها اكيد تتكلم تلفون بكبينه ..راحت للرسبشن وقالتلهم تبي تخرد الخمسه يورو .. وقعدت الفرنسيه تقرق على راسها بس للاسف ماقدرت تفهم ديمه منها شي .. وتأففت هي مشتهيه كووووولا اللي بالمكينه والمكينه ماتقبل اوراق نقديه .. راحت لانوار ..
انوار حاولت تتصل بس بيت خالتها مايردون قامت اتصلت برفيجتها ..
ديمه : انوار ماعندهم خرده اللحين شلون ؟
انوار : روحي السوبرماركت واشتري
ديمه : لالا وابوي !
انوار : مادري ليش انتِ مثاليه حيل
ديمه بجدّيه : شوفي كل شي نضحك فيه الا كلام امي وابوي يمشي غصبن عنا
انوار :اففففففف انزين اسمعي انا بقول للرسبشن تطرش واحد من العمال البقاله بنقولها احنا نخاف نروح
ديمه : بتضحك عليج
انوار: تتحدين انزين تعالي معاي
مسكت ديمه القفص وراحوا كلهم الرسبشن اللي متوهق فيهم ..
انوار حاولت تفهم الفرنسيه بس الفرنسيه اعبط منها تأشر لها على السوبرماركت تقولهم روحوله
شوي الا واحد فرنسي شايب داخل ومعاه جيس فيها صمونه طوووووويله وقفته الموظفه وقالت له عندك خرده هو دور بجيوبه مالقى خرده وطلع لهم عمله ورقيه بس تأسفوا منه وراح..
انوار: هيييييييه هذي في احد قالها تطر من الناس
ديمه : مادري عنها بس شكلنا كسرنا خاطرها وبتساعدنا
انوار: الا قولي بطينا جبدها وتبي تفتك منّـا
شوي الا دخلوا مشعل وناصر جايين من المطعم ونادتهم الموظفه على طول ..
ديمه شهقت وتطالع الموظفه : لالالالالا لاتنادينهم خلاص احنا مانبي شي
طبعا الموظفه مادرت اهي شتقول وطنشتهم كالعاده وقعدت تناديهم
ناصرمن بعيد يشوف الفرنسيه ام كشه : اللهم اجعله خير الساحره وش تبي فينا !!
مشعل : هههههههه ماعليك خلنا نروحلها ..
بعد ما اقتربوا هم ديمه وانوار ابتعدوا شوي وخلاص الاحراج ضرب العداد "كــان لزوم الكولا اليووووووووم !!!!"..
الموظفه الفرنسيه تقولهم عندكم خرده؟ وتفهمهم شوي شوي لانها مو متقنه اللغه الانجليزيه ..
والمشكله ديمه وانوار من الفشله مو قادرين يتكلمون .. ماتوقعوا ان هالساحره بتنادي الشباب وتقولهم عندكم خرده !!! بس سوتها
مشعل : انا عندي
ويلف على البنات
مشعل : جم تبون ؟
انوار منحرررررررررجه ورجعت ورى ديمه وقرصتها لين خلتها تتكلم ..
ديمه بارتباك : لالا سلامتك يلا انوار امشي
مشعل : والله ماتروحين شتبون من المكينه ؟
ديمه وجهها قلب الوان قوس قزح في قمه الاحراج ناصر يوم شافهم مرتبكين خلاهم وراح غرفته خفف شوي من توتر الجو ..
ديمه : لا بس كنا نبي كولا لاخوي ومالقينا عندها خرده ووالصراحه ماقدرنا نروح السوبر ماركت
مشعل مبتسم : بسيطه
ويروح للمكينه ويدخل فيها اربع يورو
وطلع له 2 كولا
ووباقي الخرده اللي عنده طلع له حوالي 3 كاكاوات .. حطهم بالجيس اللي كان معاه وعطاهم ديمه
مشعل : هذا لمحمد وسلميلي عليه وعلى الوالد
من كثر ماهي خلاص ودها الارض تنشق وتبلعها .. ودفع من عنده بعد ياسلام
ديمه : باخذها بس اخذ فلوسك
مشعل : عيب هالكلام قوليله ترى مشعل فاز بالمباره من دعواتك وهذا حلوان الفوز وسلميلي عليهم يلا فمان الله
راح مشعـل وهي خلاص مو قادره تستحمل .. " ليش هالانسااااااان بالذات اشوفه هني وهو نسخه من اللي كنت جايه بنسىىى ذكـراه ... يالله مو معقــول نفـس الابتســامه .. بعــد آآه متى برتـاح !!! "
اشوى ان انوار حزّتها كانت ماسكه فوفو لانه لو كان بيد ديمه يوم شافت مشعل كان بالتأكيد طاح منها
صعدوا البنات بغرفهم وكل وحده تقط اللوم على الثانيه .. دخلوا غرفه ابوهم وامهم
بومحمد : هلالالالا والله بالجياكر
انوار تنرفزت : اللحين صرت انا الجيكره ؟؟
بومحمد كاتم ضحكته : هذا اللي اشوفه قدامي
انوار تمدّ ايدها يعني تبي منه فلوس : ايدك على الفلوس
بومحمد : شدخل الفلوس بالسالفه !!
انوار تتطنزباستهزاء : دامنا هني بباريس بخليهم يسوون لي جم عمليه تجميل واتفخ خدودي و اسوي لي غمازات بعد واحط طنين مكياج ساعتها نكون ملكات جمال بعيونكم !! صح يبا
بومحمد من سمع كلامها ماااااات من الضحك هالبنت ماتسكت اللي بقلبها بتطلعه
بومحمد : يابنتي الجمال زايف كلها جم سنه ويزول الجمال جمال الروح
انوار: هذا كلام ايام اول اللحين لا خبرك عتيج
بومحمد مستغرب : حتى الجمال قاموا يشترونه بفلوس صج الدنيا توريك العجب
انوار شاشت : ايييييي يباااااااا افا عليك ماتشوف الفنانات اللحين كلهم نسخه من بعض
ام محمد دخلت بالموضوع : وتبين ابوج يشوف هالفنانات بعد
وتطقها بالكوشيه
ام محمد : قووووومي لابارك الله فيج من بنت
بومحمد : ههههههههههههه ام محمد تسوى العالم كله بنظري وتبيني اشوف هالفنانات الماصخات
ام محمد ابتسمت بخجل كأي امرأه يمدحها زوجها قدام عيالها ..
ام محمد : ماقلتي لي ديمه من وين لكم هالاكل انتوا رحتوا السوبرماركت ؟
انوار: لالالالالالا في مكينه تحت
ديمه : ياشين اللقافه تراها نادتني مانادتج ......
ام محمد : كاااااان قلتوا لي مشتهيه عصير بارد
ديمه بلعت ريجها لالاا مستحيل تردّ تحت نفس المكان
ديمه : يمى الوقت متأخر وماعندنا خرده
ام محمد : ماعندكم خرده وجبتوا كل هالاكل !
ديمه ردّ لها التوتر والارتباك " لو تدرين ان هالاكل ماجاء الا بعد احراج وقصت وجه "
ديمه : أي بس خلصت الخرده
ام محمد : انزين فجي بوكي تلقين خرده روحي جيبي لي عصير برتقال بارد
انوار نطت بتنقذ الموقف : لالالالا ماله داعي ديمه حمود قاعد خله ينزل
ام محمد : أي واحد فيكم المهم خلصونا
وحمود نزّل وجابلهم اللي يبونه
ردوا انوار وديمه غرفتهم عشان ينامون كانت ميشوو مع انوار على السرير وديمه منسدحه على القنفه ماجاها نوم ومطفيه اللمبات ومشغله الابجوره وفوفو نايم على الطاوله محطوط والجوو هادي جدا جدا ..
ديمه بهدوء : انواااار
انوار: هلا
ديمه : زين قايمه
انوار: أي انتِ شمقعدج نامي ورانا طلعه
ديمه : ماجاني نوم
انوار: شتفكرين فيه ؟
ديمه تتنهـد : مشتـاقه للـنت
انوار : اتصدقين توني افكر فيها اقول انتِ شلون صبرتي هالاسبوع بدون كمبيوتر
ديمه : لاني اطلع من الصبح ماردّ الا بالليل اكيد ماحس بفراغ .. بس اللحين اشتقت للمنتدى والقصص والمسنجر
انوار : انا مشتــاقه للكــويت ماتصورت اني بشـتاق لها هالكثـر
ديمه : توج بأول اسبوع وقلتي هالكلام فمـا بالج اللي يدرسون برى !؟
انـوار : امبي صج صج صج لله يعينهم
ديمه : مصيرهم يتأقلمون
انوار: بس الغربه صعبه
ديمه : الغربه صعبه بس هم ماراحوا يستعبطون ماراحوا الا ناوين يردون بيدهم شهادتهم والدنيا تبي تضحيه
انوار: اتصدقين قمت افكر فيهم
ديمـه : على الاقل اللي يدرسون كلها سنه سنتين اربع خمس ويردون انا افكر بالمهاجرين
انوار: أي صح بس ما هاجروا الا لانهم متأكدين انهم بيتأقلمون
ديمه : حياتهم صعبه يا انوار اللي ما شاف اهله من 10 سنين واللي موقادر يردّ ديرته واللي ماتوا اهله ونفسه يشوفهم واللي تزوج هني وخلاص ماله امل بالرجعه .. وكل هذا عشان يوفرون حياه مستقره لهم ولعيالهم
انوار : شفتي شلون احنا عايشين بنعيم ومو حاسين
ديمه : الله يخليلنا شيوخنا وديرتنا ويحفظهم من كل شرررررر
انوار: امييييييين يارب
وسكتوا شوي ..
ديمه : انا باجر لازم ادور كوفي نت
انوار : باجر يصير خير يلا نامي عاد مانبي نأخرهم
دديمه : ان شاء الله تصبحين على خير
انوار : وانتِ من اهله ..
ديمه ترددت : انوار
انوار بنفاذ صبر: هلا؟
ديمه تندمت : لا مافي شي خلاص نامي
درت انوار ان ديمه مانامت وكانت تفكر بشي وهالشي شاغلها عن النوم بس النعاس غلبها وقالت
انوار: ديمه نامي والا ترى اشيل قشي وانام بالممر
سمعت انوار ضحكه ديمه وابتسمت ونامت
وبجذي انتهى خامس يوم لهم في باريس