[مهندس الكلمة]

اهلا وسهلا شباب ..

ابدأ مع مس ايفل .. تخصص إدارة الاعمال تخصص شقولش عنه يعني، يعني انت ما تتخصص في شي معين .. تدرس من كل شي شوي، وبعدين اذا جيت حق الوظيفة (الزينة) بتشتغل اخصائي حسابات لو شي يعني مو قد الطموح .. وما تتطور بسرعه، بس غير اذا تتخصص في شي معين..
الحين اللي ما يبغونش تدرسين محاسبة شنو يبروون الاسباب؟؟ لو مثلا قالوا انش متعبة روحش وداشة علمي وإلخ ..،، صدقيني من اللي اشوفه! طلاب العلمي مكتسحين الساحة في المحاسبة! واللي هم درسوه في الثنوي (طلاب التجاري) كله، تدرسينه في اول كتاب جامعة محاسبة وعليه اضافات بعد.. اما تخصص المحاسبة في وجهة نظري perfect..

الهندسة المعمارية، اعتبره تخصص ذو حدين!،، يعني اقدر اقول عنه تخصص صعب ومتعب وتحتاج فترة طويلة علشان تصير عندك الخبرة اللازمة علشان تقدر في المستقبل تتعملق (ان صح التعبير)، يعني المهندسين المخضرمين عادي يحصل ألف دينار علشان يوقع على خريطة (ما يسووويها)، بس علشان توصل لهالمستوى مثلا لازم يكون عندك مكتب هندسة وهالعملية معقدة، والا الوظيفة فمكانها يعني معروف في بعض الوزارات والشركات الكبيرة مثل بابكو وبتلكو وألبا (وهي شركات ما تحتاج أو بمعنى آخر ما تاخذ بحرينين واجد).. باختصار تخصص مشبوه :D

اما الهندسة الكيميائية! اعتقد ذا بلانكو يقدر يخبرنه عنه! ( هو يعرف السبب)

انصحش انش تدرسين رغبتش علشان تكونين مرتاحة في الدراسة! لان في وجهة نظري اهم نقطة في الطالب الجامعي يكون متصور مستقبله وراسم في باله خطة واضحة علشان يقدر يتفوق و يحب الدراسة ..

........

ذا بلانكو اختيارات ممتازة طبعًا وانت قدها وقدود

بالتوفيق جميعا ...


مهندس الكلمة