الأخت حرم الوزير ،،
للأسف طريقتك في الرد و الكتابة عن الصندوق تشعرني بالضجر ،،
لأنك تجعلين من الحبة قبة و من القبة حبة، و تذكرين المشكلة كفلم هولوودي يبتدأ بتوم كروز و هو يحمل 5 رشاشات في يد واحدة و ينتهي بجوليا روبرت تتمشى على قارعة الطريق !!
لنحلل أنا و أنت ما ذكرتيه عن الشاب و لنعرف هل الصندوق خاطئ !
عنده سيارتين بس مو من حق الصندوق يقول ليه بيع سيارة منهم، بس من حقه يطلب من الصندوق انه يساعدونه !!
ما عنده فلوس يتعشى ، ياكل رويد و يتجشى ..
يا أختي اللي عنده سيارتين و عنده مشاكل مالية فأعتقد إن الأولى انه يبيع سيارة علشان يساعد نفسه، مو يطلب معونة من الصندوق ويوم عطوه حل منطقي قلتين لا ما يصير يقولون ليه يبيع سيارته، و لا أزيدش من الشعر بيت، ما يصير يسألون عنه و المفروض من قال ليهم اعطوني مساعدة عطوه على طول بدون لا أحم و لا دستور ولا برلمان حتى !!
تقديم الطلبات للجامعات لازم تنتظر شهر علشان يوافقون عليها !! هذا وانته بتدفع ليهم فلوس بعد، مو مؤسسة تعطيك فلوس وتطلبين انها ما تتكلم ابداً ،،
نرجع لسالفة المرأة المؤمنة ،،
انا قلت ليك كلام واضح وجلي، أروح اتكلم ويه الصندوق بنفسي و أعرض كل المعلومات عنها في هالصفحة و تتحملين النتيجة ؟! بس مثل ما اشوف انتين تتحملين نتيجة انه تتهمين الصندوق وكأنه الصندوق لأعضاء الصندوق بس وما في احد يستفيد منه !!، و الله تعتقدين إن شاء الله الصندوق مفتوح حق اللي تعرفينهم بس ؟! ما سألتين نفسك الصندوق ساعد كم شخص و ما هو محتاج يكتب لا في انترنت و لا بطيخ !!
و الحمد لله أبو محمد ما قصر ،، كان واضح و صريح و جاوب بدون أي عصبية مثل ما هو موضوعك ،،
و ببساطة المرأة المؤمنة الله يحفظها ويساعدها كانت تعاني من سنتين !!، ألحين بس قاعدة تحمل الصندوق المسؤولية ؟! أو ممكن بالأحرى انتين اللي تحملين الصندوق المسؤولية، و ما أعتقد إلا إن الصندوق يعمل في حل مشكلة هذه المرأة المؤمنة، بس ما أدري هو رغبة منك في زيادة المشاركات ؟! أو رغبة منك في تأليف فلم جديد للعميل 007 جيمس بوند ؟!
يا أختي هذا الصندوق موجود و يعمل لأجل كل الديرة و مو قاعد يعمل لناس محددين بس، و للأسف إذا واحد الصندوق ما ساعده، دوماً يعتبر الصندوق مخطئ !! حتى لو كان عنده 4 سيارات + 5 فلل + 4 دكاكين بالإيجار + بناية مؤجرة ، اييه الصندوق ما ليه خص فيهم، الصندوق عليه يدفع فلوس ليه و بس!!
الله يهديني بس !!