طرائف و مواقف مضحكة أثناء الامتحانات ...

الـعـرَّاب · 11-05-2005, 09:28 AM

السلام عليكم ..

أتمنى من جميع الأعضاء الذين صادفتهم مواقف مضحكة أثناء تقديمهم للامتحانات أو في فترة الامتحانات بشكل عام وضعها في هذا الموضوع ...

و شكرا ..

الـعـرَّاب · 11-05-2005, 09:36 AM

سلام عليكم ..

أتذكر أن في الفصل الماضي ... ، كان عندنا امتحان حيا213 ( أيض و اتزان 2 ) .. و هذه المادة تحتاج ان تحفظ 12 رسمة تقريبا .. وهذا حق الي يبي يمشي اللعب بس ..

جانا طالب ويانا مصور الرسمات كامل و حاطنهم في تلفونه ( 6600 ) ..
الأستاذ الي كان يراقبنا معروف عنه انهو سامنديقا .. يعني وجودك عندي كما انت غائب ...
يطلع تلفونه و يقع يحووووووووووس فيه و لا يدري من غش و من خلص ...

المهم .. هذا الطالب طلع تلفونه و قام يغشهم رسمة رسمة لما خلصهم كامل ...
الطلاب الباقين قالوا له يا يعطيهم الرسمات أو بفتنون عليه ..
خاف المسكين .. فقال لهم شغلوا البلوتوث ..
و قام يطرش ..
و ما جفنا الا الاستاذ يضحك ..
طلع هو الأخ مشغل البلوتوث و استلم الرسمات كاااااااااااااااااااااامل ...

لكن مع هذا الدليل القوي الي عنده ...
لا عور راسه و لا شي ... قال لهم كملوا الحل و أهم شي انا ما ابي صووووووووووووووووووووووت ..

أكيد المظلوم عرفه !!!

السلام العام · 11-05-2005, 10:54 AM

ههههههههههههههههههههههههههههههه خوش شي والله

المهم اني عندي موقف بس شووي قديم

من ايام الاعدادي

كان عندنا امتحان رسم واللي تراقبنا معلمه الانجليزي

معلمة الانجليزي شوي شديده مو شووي وااااااجد والكل يخاف منها

المهم اني ما احب الرسم ولا افهم اليه اهم شي اخلص واعطي الورقة

رسمت الرسمه وقلت يالله خلنا نلونها الحين واهم لون ماكان عندي

اللي هو اللون الاسوود

طلبت من المعلمه انها تسأل البنات اذا عندهم لون الاسود وما يستعملونه علشان اكمل رسمتي

المهم الكل هذاك الوقت كان مشغوول بالرسم ومحد فاضي يعطيني الوانه

قلت يالله خلاص ماليه داعي بعد

حطيت راسي على الورقة ونمت

طق الجرس الا المعلمه على راسي يالله يا بنتي جيبي هالرسمه

الا اني فاتحه عيوني اليها اقول ليها ما كملت ما كملت ما يصير

حشى مو امتحان رسم هذا

المهم في خمس دقايق عطتني اللي صوبي لون اسود وكملت الرسمه وعطيتها المعلمه

اخر شي تقول لي المعلمه كملتي النوم والله لا؟؟؟؟؟

المظلوم · 12-05-2005, 04:59 PM

سلااااااااااااااااااام .

بلانكو .. تقصد ..واحد من مدرسين الحاسوب لو واحد غيره !!! ..

.. تمنياتي ..

الـعـرَّاب · 12-05-2005, 08:09 PM

هذا هووووووو خوووووووووك هذا هوووووووو
من غيره يصارخ " السووووووووووووووووووووووووت "
و يحوس في التلفون 26 ساعة ...

السلام العام · 12-05-2005, 08:41 PM

يصير اشارك مرة ثانيه طبعااا بموقف ثاني

مو كيفكم باشارك

المهم اليوم عندي موقف من ايام الثانوي

وحصة الرياضه

ذاك اليوم كان توه شهر ابريل وكذبة ابريل والكل يبي شي ملفت

المهم اني رجعت البيت وسويت روحي متضايقه والكل يسألني ويش فيش؟

واني ساكته وامثل الحزن والضجر يدفع الله البلاء

المهم الوالده سألتني ويش فيش نافخه وجهش رديت عليها ما فيي شي

بس المدرسة باجر يقولوون لازم ما تدخلون الا بولي الامر

الا هي معصبه ورافعه الصوووت ويش مسووووووويه ؟

مفشلتني ويا المدرسه ويش مسوويه تكلمي له

واني بعد مثلت عليها عدل وقعدت اصيح وقامت نادت اخويي علشان يوم ثاني يروح ويايي المدرسه

المهم اني رحت يوم ثاني المدرسة ولا افتكرت في الموضوع نسيته واخويي نساه

وفي نفس اليوم كنا في الصاله عندنا حصتين رياضه ورى بعض مقرر الريشة الطائرة

وطلعت المعلمه من الصاله صووب واحنا نروح المقصف صوب ثاني ونقعد ناكل لأن نعرف ان المدرسة بتطوول في الاداره

وبالصدفه ذاك اليوم ما طولت وجت وشافتنا محد وهاوشتنا وقالت مافي باجر تدخلووون المدرسه الا لما تجيبوون اولياء اموركم كلكم

ورجعت البيت واني ضجرااااااااااااااااااااااااااااااانه حدي صار الموضوع جد

هذا كله نتيجة هالكذبة

المظلوم · 12-05-2005, 09:13 PM

سلااااااااااااااااااااااام .

طريق الجذب شين ..

>> الحمدلله إن ولا مرة اضطرينا لإستدعاء أولياء أمورنا .. !! ..

>>> بلانكو .. بس حش في الرجال .. لو ماهو جان نص المدرسة راسبة في ذاك الإمتحان !!! <<

>>> أنا اشوف مال صفكم طلعوا مستانسين .. والله اللي يراقبكم الأخ ... <<

..
تمنياتي .

الـعـرَّاب · 12-05-2005, 09:35 PM

أختي السلام العام ...
لو تكملين السالفة لأن نبي نعرف ...
جو ليش بيتكم يوم ثاني لو لا !!!!!

اما انت يالمظلوم ... فيمكن مظلوم في شي واااااحد ...
أن هالاستاذ هالطيب هذا ما يراقب لكم ...
هههههه
و لا مرة راقب لنا امتحان و طلع طالب واحد مضجر ...
صدق رجاااااااااااااال
جزاه الله خير الجزاء

السلام العام · 13-05-2005, 01:43 AM

هههههههههههههههههههه هلا اخوي بلانكوو

بل بل عليكم يا حبكم للشماته

اي يوم ثاني ما رحت المدرسة الا بولي امري ورحنا المدرسة وناديت على المدرسة وهي نست السالفه اصلالا

وما في احد من البنات ودى ولي امره غيري وبنت اخويي ما قالت الى ابوها بس قالت خلاص مدام عمي جاي الى عمتي اني باكون وياها يعني بدل ما تفشل ابوها

فشلت عمها مرتين

كفايه عليه اخته وبعد هي جت وزيدت السالفه

اخويي يتصبب عرقا بس ولله الحمد كان في مدرسة من مدرساتنا طايفين ومدحواا فينا عند اخويي

شوي عن الفشيله

بس رحت البيت وعلى الغدا حصلت لييي كم زفه من الزين

كل واحد يطحن من صووب مفشلتناااااااااااا

حنان · 15-05-2005, 11:36 PM

هههههههههههههههههههههههههههههه

اتذكر موقف صار ليي في الامتحانات النهائيه في ثاني ثنوي
كان عندنا امتحان محاسبه جانا سؤال خربطنا ما ندري وش انسوي فيه والي قدامي تضرب على الكرسي علميني

المهم قمنا نسال المعلمة الي اتراقبنا وهي اتقول ااني ما اعرف الى الماده والبنات كل وحده اتفهم الثانيه في قاعة الامتحان وهي عادي عندها (( اتغشش البنات من قدهم بعد ))

وبعدين انتبهت الي لبنيه الي قدامي وهي اتقول ليي علمين

جان اتجي لينا واتقول لينا غشوا ثنتينكم من بعض بس انتبهوا الى المشرفه والمعلمات اذا جوا ما يجوفونكم

طلعنا من الامتحان وحنا مو مصدقين ..... قمنا نضحك

والا ازيد من هذا قمت اعطي المعلمة الورقه مالت الامتحان الا اتقول لبنيه الى المعلمه خلها اتجوف ورقة ابنيه من البنات وتعطين الاجابه .... والمعلمه عفيه عليها خلتني اطالع اوراق البنات بعد

والله ايام الثنوي ايام وذكريات ما تنسى يلا الحين اخر شي هالفصل ونودعهم

حنان

شهد · 16-05-2005, 10:20 AM

السلاااام عليكم..

>> حنوونة المدرسة بدونش مو حلووة ..

معلتمنا المتج بتعطينا اختبار .. وقبل ما تعطينا اياه شرحته لينا على السبورة .. ويوم عطلتنا الاوراق انتبهنا ان هي ما مسحت السبورة.>> بنات حشورين يقولون.> معلمة ما مسحتنها..:eek: الا تقول ادري .. بخليها ليكم عشان تطبقون عليها مثلها وكلكم تنجحون ..
آخرشي محد جاب درجة كاملة الا جم وحدة..
بس صدق هالمعلمة عجيبة:D ..

ببايوو
قبوسة :fruits_ap

حنان · 16-05-2005, 11:05 AM

ويش انسوي يا قبوسه يلا كلها جم سنه وتطلعون ونجوفش في الجامعه ويانا بيصر ليكم فجه انتون بعد

لكن قبس هاذي المعلمه اني اعرفها درستنا من جهة عجيبه فهي عجيبه لكن خبرش البنات ويش ايسوون فيها

اذكر انها علمتني في اول ثنوي اذا تطلع من صفنا على طول الاداره عند المشرفه ما يصير ما تدخل صفنا يوم وما تروح الى الادراه حتى في يوم البنات واجد زودوها وياها الى درجة انها با قي اشوي ودمعتها تنزل <<< الله يكون في عونها مسكينه

حنان

SPACETOON · 21-05-2005, 12:14 PM

اسألو Aalistar ويش صار ليه عن امتحان اليوم ؟! الله يغربل ابليسك على هالسوالف

s.jawad · 21-05-2005, 12:57 PM

الله يقطع شرك يا سبيس تون ..

يقول المثل .. استر على ما واجهتك .. يا حبكم لفضح الناس

اقول خوك نخليها مستورة احسن .. وإذا انتهينا من المسألة ..

نجي نحط رد في هالموضوع ..

كككككككككككككككككككك

اخوكم

~! بنت النور !~ · 21-05-2005, 01:55 PM

شكراً ع الموضوع ,,

وحبيت أقول لكم موقف صار لي في الإعدادي ,,

كان عندنا إمتحان التربية الأسرية ,,

وشسمه كان علينا حفظ رسمات الخياطة ,,

ونسيت أحفظهم ,,

وكانت المعلمة قايلة لنا نحط كتبنا ع الأرض ,,

وتمت المعلمة تطل من دريشة الصف تتأمل في الطبيعة !

فأخذت الكتاب وفتحته ع الرسمات ونقلت كلمة كلمة !

هع ,, << غشاشة ,,

s.jawad · 21-05-2005, 02:20 PM

أفادت مصادر إعلامية مقربة من المدعو س.ج.م.ج (عالي ستار)، بأنه سيتأجل مسألة حسم انتقاله لناديه الجديدة (المرحلة الدراسية القادمة)، وذلك بعد ان خضع لعملية خداعية ناجحة من قبل الطبيب الزمن الغدار، فقد فاته احد امتحاناته مما حذا به لرفع قضية على الطبيب الزمن الغدار لدى الجهات المسئولة ليطمئن قلبه على مستقبل، وهو الآن ينتظر أمر القاضية (لجنة الأعذار) في امكانية اعادة هذا الامتحان له ..

وبالتالي فإنه سيتعين على محبي هذا النجم الكبير الانتظار قليلاً لتطمئن قلوبهم على صفقة الانتقال التي نتمنى لها ان تتكل بالنجاح ..

اخوكم
أبو المشاكل والفضايح
مذيع الأخبار بقناة عالي.نت

الـعـرَّاب · 21-05-2005, 03:19 PM

الله يهديك بس يا عالي ستار ...
بتفوت اول مباراة في الموسم الجاي ..
والسبب ويش ؟؟؟
النوم ... خل البلانكو عنك تراهم ما يفيدونك ...
و انتقل حق الخفافيش تراهم يعجبونك !!!

الحجيرية · 21-05-2005, 07:02 PM

سلاااااااام

هههههههههههاي يعني اللي فهمته ان " عالي ستار " فاته الامتحان والسبب النوم هههههههههههههههاااااي

طبعا مشكور خيوووو " بلانكو " على هالموضوع .

يوم كنت في سنة ثالثة كان عندنا امتحان نهائي ودكتورنا جايب لينا مصطلحات عجيبة وغريبة مادري من وين , عن جد مو موجودة في الكتاب " لاني عن زعم شاطرة لو في الكتاب جان بعرفها لاني مراجعة عدل " زين وكل البنات والصبيان قالوا للدكتور ان ما فيه الا مصطلحين من الكتاب والباقي من خارج المقرر , فدكتورنا تفهم الوضع وقال كتبوا اللي تعرفونه وأنا ما بحاسبكم على هالمصلحات , زين وفي وقت الزحمة والمناقشة بين الدكتور والطلبة , صديقتي اللي صوبي كانت متحيرة في سؤال مقالي ماهي عارفة وش يبغي الدكتور بالضبط نكتبه فعاد قامت تسألني عن الاجابة تقول ليي " بس قولي ليي هالسؤال تبعي أي درس وأني بكمل " عاد مسكينة صديقتي ما طاحت الا فيني لأني بجد ما أعرف أغشش " أني بس أرفع راسي وأشوف ناس يغشون أمووت من الضحك وضحكتي تكون عالية يعني أنفضح , مو بعد أغشش جان صارت مهزلة بعدها طردة من الزين " عاد صديقتي كانت لحظتها باقي شوي وتصيح لان السؤال عليه 10 درجات , رفعت راسي ليها شوي بغششها عن زعم جان أطالع في وجهها وهو صاير أحمر من الخوف وأمووووووووت من الضحك "هههههههاي " ودكتورنا من النوع الهادئ اسمه عبدالله سلمان معروف في الجامعة بهدوئه وعدم تشدده كان يقرأ ورقة الامتحان ومنزل راسه وما سمع مرة وحدة الا صوت ضحكة قوية قام يطالع مني ومناك فينا مو عارف مصدر الصوت , والبنات اللي ويايي والصبيان في السكشن قاموا يضحكون بعد لان عرفوا هذي ضحكتي لانها مميزة بس أشوى ما قالوا له ان هذا أني , بعدين قال دكتورنا رجاءا هدوء ونزل راسه مرة ثانية وفي هالاثناء أني رفعت ورقتي لصديقتي تشوف بداية الاجابة عشان هي تكمل عليه لان هي بعد شاطرة بس مو عارفة أي الاجابة اللي تناسب السؤال .

ويوم خلصنا من الامتحان انقلب السكشن كله ضحك على الموقف , لكن أهم شي قدرت أساعد صديقتي عشان لا تضيع عليها 10 درجات , بعدين صديقتي ودتني كافتيريا الجامعة وريقتني على حسابها عن زعم مكآفاة ليي .

آسفة على الاطالة " بس شسوي عجبني موضوعكم وحيبت أشارككم فيه "

تحياتي " الحجيرية "

الـعـرَّاب · 21-05-2005, 11:30 PM

ههههههههههههه

أحسن شي رد الجميل ...

أحنا احيانا نتساعد بحيث ان كل واحد يحفظ جزء معين و يصير التبادل بعدين ...

لأن احنا شطار في كل شي ... حتى الغش ..

لكني الصراحة عمر ما اعتمدت على هالطريقة ...

مو لان انا شاطر او ما اعرف اغش ..

لاني ما اثق في غيري ( أقصد مراجعة غيري ) و احس ان فيها مخاطرة ..

شكرا على مشاركاتكم ..

السلام العام · 21-05-2005, 11:35 PM

اخيراا الحجيريه طلت علينا

وينش يوبه من زمان ما شفناش

عاش من شافش

مسكين دكتور عبدالله سلمان

كان مدرسني مقرر علم النفس وكانت رجوله مكسووره

وكان على ايام الصيفي في المدينة في نخلة حلوووووووووه صوب السكشن

طبعا احنا نشووف الدكتور انه وصل واحنا قاعدين في الكانتين وساعه على بال ما ينزل من السياره ويطلع اغراضه ويعدل غترته وعكازه

المهم اول ما نشووف السيارة واصله نرووح الى النخله ونمقع الرطب اصفر بعده ما استوى ونجمع الينا في ايادينا كم وحده ونمشى الى السكشن

ومثل ما قلتين اختي حجيريه هو الدكتور هادئ ناكل ونتكلم ونسوي مسابقات وهو يشرح

اخر شي طاحت الرطبه ووصلت الى طاولته

واحنا ما نقدر نسكت اني اقوول ما عليي ابي الرطبه

وصديقتي تقول سكتوو فضحتونا

والناس كلها تطالعنا وتقول ويش صاير؟؟؟؟؟؟؟؟

يتهاوشوون على ويش؟؟؟؟

واخر شي الدكتور رفع راسه يقول شنووووو؟؟؟؟ عندكم استفسار؟؟؟؟؟

بس هذا اللي قدر عليه مسكين

يعيطكم الله العافيه وشكرا

المظلوم · 22-05-2005, 12:08 AM

سلااااااااااااااااااام . .

.. مواقفكم .. طريفة .. ولكن موقف عالي ستار .. محزن ..

فوتت عليك فصل كامل .. علشان .. نومة .. الله يساعدك

>> بلانكو .. أشوف قمت تقول شعر في الخفافيش ..

.. تمنياتي ..

s.jawad · 22-05-2005, 05:40 AM

لا شباب ..

ما فوت امتحان كامل ..

ثاني شيء انا ما كنت نايم

القهر كنت قاعد بس احسب الامتحان الفترة الثانية لا ومستانس وكل شيء على راحة .. والشباب المتفرغين ما اتصلوا ليي إلا بعد الامتحان .. يقولون ليي وينك ..

على العموم أنا دبرتها ووديت ليهم عذر رسمي .. وان شاء الله مع امتحانات الدور الثاني

أخوكم

المظلوم · 22-05-2005, 10:59 AM

سلااااااااااااااااااام ..

اها إذا جذي .. أحسن ..

بالتوفيق .. أهم شي تدش الإمتحان وانت مراجع ..

تمنياتي .