إي والله ذكرتنا
الاول طباخ الوفاه عندنا في بيت جدي في الليل يجيبون البقرة ويدبحونها عن باب بيت جدي وتشوف الرجال شغالين في الدباح والتنظيف وبعدها يوزعون اللحم ويخلونه على كوارتين والرجال ينامون برى ويا اللحم والحريم من المغرب شغالين على تفريم البصل وهالحاجات كلها واحنا الصغار نقعد نطالع ومستانسين بالجمعه كلها الاهل كلهم موجودين شي صدق مميز ويوم ثاني من الصبح تشوف قدور الطباخ وتحتها الضو بإستخدام الخشب ويكونون النسوان بهالوقت يجهزون السلطة للمأتم والجح وغيره .. الله على ايام زمان
اذكر اخوي الكبير و ولد عمتي اللي بمثل عمره يتهاوشون على ذنب البقرة المذبوحة وبالاخير يملحونها ويخلونها حرس على باب البيت .. ههه
الحين غير كل شي يجي جاهز من عند الطباخ ويبقى شي واحد وهو اطلع مع ابوي من الصبح عشان نروح المركزي نشتري اغراض السلطة ونوديها المأتم والنسوان ما يقصرون هناك 