:: تعليمات التسجيل بجامعة البحرين ::

[درباس]

السلام عليكم ورحمة الله وبركاته ..

تتقدم كل من الأختان درباس وشجرة طوبى في هذا الموضوع بتقديم نبذة بسيطة

عن تعليمات التسجيل واللوائح بجامعة البحرين ..

وقد رغبنا بطرحه بأسوب عامي أكثر من فصحى على شكل حوار مسنجري دار بيننا ..

ولإضفاء روح المرح قليلا ..

متنميتان أن يحوز على إعجابكم والأهم هو فهم هذه التعليمات وهذه اللوائح ..

---

هذه درباس



وهذه شجرة طوبى

إليكم الحوار :

---

(1)

أيـــــــــــام التسجيل والحذف والأضافة

طوبى : السلام عليكم

درباس : وعليكم السلام

طوبى: درباس أني اليوم طايرة من الفرح

درباس : ليش ؟ وش صاير ؟؟

طوبى:الجامعة قبلتني ولا وفي التخصص اللي أبيه

درباس :صدق
مبروووك ألف مبروووووووووووووك
انزين وش التخصص الي عطوش ؟؟

طوبى : الحقوق

درباس : مبروك طوبى والله تستاهلين وبالتوفيق

طوبى: بس الحين بيونا انكمل إجراءات التسجيل
وأني ما أعرف ويش أسوي !!!


درباس : انزين .. عندش رسالة القبول مالت الجامعة ؟؟

طوبى .. أي عندي رسلوها إلى على البريد

درباس : تقدرين تاخذينها بعد من موقع الجامعة لأن يقبلونها

طوبى : انزين اني الحين ما أقدر أفتح الموقع لأن ما عندي الباسوورد

درباس : هذا الباسوورد إليه وظيفة ثانية .. في موقع الجامعة في وصلة تفتحينها وتحطين رقمش الشخصي ورقمش الأكاديمي وبتطلع اليش رسالة القبول ..

طوبى : مشكورة

درباس : العفو خيو


طوبى : انزين ويش اسوي بعدين برسالة القبول

درباس : اممم .. في موقع الجامعة أو في رسالة القبول عندش بتشوفين تاريخ التسجيل مال دفعتكم لأن كل دفعه لها تواريخ محدده وبما انش دفعه 2007 فبيكون آخر يوم من أيام الحذف والأضافة ..


طوبى : انزين اذا رحت الجامعة ويش اسوي ؟؟ وين أروح ؟؟

درباس : أيام الحذف والأضافة يكون التسجيل في الصالة الرياضية صوب المكتبة .. اذا جيتين وياي بدليش .. باعتباري عندي خبره احم احم ..

طوبى : أشلون أطلع جدولي الدراسي ؟؟

درباس : لأنش ما تملكين بطاقة جامعية لحد الآن فبتبرزين اليهم رسالة القبول ..

طوبى : انزين في وين يصير طباعة الجدول ؟؟

درباس : لما تدخلين الصالة بتشوفين ثلاث أو أربعة اقسام عليهم لافتات
القسم الأول على اليمين ويكون لدفع الرسوم التسجيل والقسم الثاني للحذف والأضافة .. القسم الثالث : لطباعة الجداول والقسم الرابع يكون لصحاب الأعفاء ..

طوبى : انزين نقدر انسوي حذف وإضافة للجدول واحنا دفعه 2007؟؟


درباس : في دفعتي لما رحت اسوي قالوا الي ما يصير .. بس اذا تبين تتأكدين علشان اضيفين مادة أو شي روحي قسم التسجيل أحسن ..

طوبى: سمعت بعد عن شي يسمونه اضافة مقعد أو كرسي .. يعني ويش ؟؟

درباس : هذا اذا كنتين تبين اضيفين مادة والسكشن مملوء بطلبة .. فتروحين الى رئيس القسم تبع المادة وتلبين منه توقيع حق اضافة مقعد وبعدين اذا حصلتين الموافقة .. خلاص تكملين باقي اجراءات عادي ..



تكملة .. انتظرونا ..

[درباس]

(2)

التسجيل المبدئي

---

طوبى : انزين يعني ويش التسجيل المبدئي ؟؟

درباس : التسجيل المبدئي يصير بعد ما دشين أول كورس في النصف الكورس الأول قسم التسجيل يحددون اسبوع كامل للتسجيل المبدأي ويكون يا عن طريق انترنت من خلال الباسوورد أو عن طريق تملين استمارة من نفس القسم المواد تبع خطتش الدراسية

طوبى : أي الحين فهمت .. انزين الباسوورد والبطاقة من وين آخذهم ..

درباس : بعد نفس الشي خيو .. قسم التسجيل بتحدد فترة محددة حق تاخذون البطاقة والباسورد وهذا بيكون من مبني التسجيل القديم

طوبى : في وين يصير هذا ؟؟

درباس : هذا يكون ورا كلية إدارة الأعمال .. قلت اليش تعالي وياي أول يوم .. بعرفش على جامعة البحرين العريقة ..

طوبى : بعد عندي سؤال ثاني

درباس : تفضلي

طوبى : بعد ما استلم الجدول ويش اسوي ؟

درباس : بعد ما تستلمين الجدول ونفس المواد الي تبينهم.. تروحين الى المحاسب حق تدفعين ..

طوبى : انزين كم أقصى عدد للمواد الي أقدر أسجل ؟؟

درباس : تقدرن تسجلين 7 مواد كحد أقصى و4 مواد محد أدنى .. وسماح بتسجيل 3 مواد لمدة كورس واحد طول فترة دراستش بالجامعة .. وهذا بعدين يتغير على حسب معدلش ..

طوبى : انزين ما نقدر ندفع في مكان ثاني لأن يقولون زحمة واجد يصير ؟؟

درباس : بلى تقدرين تدفعين من خلال البنوك .. بنك البحرين الوطني أو بنك البحرين الأسلامي .. وانصحش تسوين خطتي .. اني اروح ادفع اول يوم دراسي لأن مافي ناس واجد وبعد ماتلحقين ..


طوبى : انزين تواريخ امتحانات النهائية اشلون اعرفهم ؟؟

درباس : تواريخ امتحانات تقدرين تشوفينهم عند كل مقرر في الجدول الدراسي .. والتسجيل تحذف المقرر الكترونيا اذا تعارض مقررين امتحان بنفس اليوم أو نفس وقت المحاضرة .. فيطلبون منش اتغيرينه ..



هناك تكملة

wait us

[درباس]

(3)

الأنسحاب

---

طوبى : تعبتش دربوسة بالأسئلة .. بس ابي اعرف كل شيء .. خبرش انزين

يصير انسحب من مادة ؟؟ اذا مو مرتاحة من وقت المحاضرة أو الدكتور مو اعاجبني ..

درباس : انسحاب في الجامعة أنواع ..
1. اذا انسحبتين في اسبوع الأول أو الأسبوع الثاني من بداية الدراسة
يردون اليش جزء من الرسوم النص أو الربع ..
2. انسحاب بدرجة W وهي انش تنسحبين من جميع المقررات لمدة فصل واحد ويسجلونه في ملفش الأكاديمي
3. انسحاب بدجة WF وهو انسحاب اجباري اذا تكرر غيابش بنسبة 25 %
3. انسحاب غير رسمي وهو انس تقدرين تنسحبين لمدة فصلين فقط طوال فترة دراستش بجامعة البحرين

وانصحش تتطلعين على موقع الجامعة بفيدش واجد ..

جامعة البحرين


last one

[مهندس الكلمة]

موضوع مفيد جدًا تشكرون عليه

اسلوب مميز يعيد إلى الأذهان الموضوع المثير للجدل بين مس ايفل والعاصفة

ههه

تم تثبيت الموضوع

شكرًا جزيلا ً


مهندس الكلمة

[درباس]

(4)

الدرجات والتقييم

---

طوبى: انزين عندي فضوول اشلون يحسبون الدرجات في الجامعة مثل المدرسة ؟؟

درباس : أمم بشرح اليش .. لما تدرسين أي مادة طبعا علها 100 درجة
50 بتكون حق النهائي وهذا ما في شك و50 بتكون تحت تصرف الدكتور بين درجة المنتصف وأعمال الفصل ..

طوبى : ويش عن المعدل ؟؟

درباس: بعدين لما يطلعون الدرجة تكون تقديرية في الشهادة .. وهذا مو منصف للطالب بدرجة أولى .. يعني لما تاخذين 90 وتاخذين 100 هو نفسه يحطون اليش A.





طوبى : وهل المعدل التراكمي مثل المدرسة ؟

درباس : أممم تقريبا.. درجة المقرر تنضرب بعدد الساعات المقرر وبعدين يجمعونهم ويقسمونهم على مجموع الساعات ..

طوبى : انزين هذا المعدل التراكمي شنو الحد الأدنى اليه .. لأن اسمع ساعات الجامعة تطرد الطلبة اذا نزل معدلهم ..


درباس : المعدل يختلف من كلية الى أخرى .. يعني في كليات 2 وفي كليات 2.5 وفي كليات 1.76 بس أهم شي ما يقل عن المعدل المطلوب لتخرج ..
طبعا اذا الطلبة نزل معدلهم عن المستوى المطلوب يطرشون انذار ويمنحونه فرصة فصلين علشان يرفع معدله واذا رفعه يشيلون عنه انذار أما اذا ما ارتفع يعطونه انذار ثاني وبعده الأخير وبعده طرد ..

طوبى : انزين الجامعة فيها تظلم ؟؟ يعني اذا مومقتنعه بدرجتي في مادة معينة بعد ما يطلعون النتائج ..

درباس : لا تخافين فيه .. بعد ما تطلع النتائج .. قسم التسجيل يعلنون عن فترة معينة للتظلم وتدفعين 10 دنانير لكل مادة .. احم احم لازم تتقرقشين اشوي .


طوبى : اني مرة صار الي جدي في المدرسةورفعت تظلم في مادة وطلعت الي 5 درجات لكن دفعت بس 5 دنانير ..

درباس : الجامعة اغلى اشوي لزوم الضرائب

طوبى : يالله هذه جامعة متطورة ولازم تواكب العولمة .. ااخخخ

طوبى : بعد سؤال ؟؟ يعني شنو UTH

درباس : هذه ايام الأسبوع في الجامعة تنقسم الى UTH ومعناته الأحد والثلاثاء والخميس وتكون المحاضرة مدتها 50 دقيقة وmw ومعناته اللأثنين والأربعاء وتكون مدة المحاضرة ساعة ربع ..

طوبى : انزين اني محصلة منحة وصديقتي محصلة بعثة وين انروح ؟؟

درباس : اذا بعثة بعد ما تطبعين الجدول تروحين الى المحاسب وما تدفعين بس تكون عندش ورقة من وزراة التربية التعليم تثبت هذا الشي .. وبس بعدين يختمون جدولش وخلاص وتروحين مرة ثانية قسم التسجيل ويختمونه علشان ياخذون نسخه منه ..
أما اذا كنتين منحه .. فحالش من حالي .. ندفع كأي طالب عادي ..


طوبى : انزين اذا ابي اشتري الكتب من وين ؟؟

درباس : في مبنى عندنا يسمونه مركز بيع الكتب تعطينهم اسم المقرر ورقمه ويعطونش الكتاب واذا ما حصلتينه عندهم تقدرين اتحصلينه في مطبوعات الجامعة في نفس المبنى ..

طوبى : انزين اني اذا أبي اروح الجامعة اول يوم دراسي وما عندي سيارة اشلون ؟؟

درباس : نفس الثانوي تروحين بباص وكل منطقة اليهم باص ويكون بنفس المحطة مالت الثانوي على أغلب .. اني كله أقول مال أول سنة جامعة يضحكوني بس انتين لا اخخخ

طوبى : أفا ماعلي أراويش .. لكن بعد بسألش
دوام الجامعة من متى الى متى ؟؟

درباس : لا افا امزح وياش .. الدوام من 8 الى 4 اأو خمس .. في عندش اسئلة ثانية ترى أحنا حاضرين

طوبى : في باصات ؟؟

درباس : أي في نهاية الدوام يعني قبل الأذان بساعة .. تروحين البيت وسيدا تصلين واذا عليش مسائي .. عادي واصلي الى الليل .. اخخخخخ

طوبى : بال كل هذا في الجامعة ما تسوى علينا

درباس : أي كل هذا وازيد بعد .. بس لا تخلين عقبات جامعة البحرين عوائق من استمرار في الدراسة والتفوق بعد .. لازم تحطين بالش وتجيبين معدل وخصوصا أول كورس

طوبى : الحين جاي رمضان ؟؟ اشلون التوقيت؟؟

درباس : التوقيت يتغير والمحاضرات تكون أقصر .. Don't worry

طوبى : الله يساعدنا على الجامعةالكريمة الي فيها تقشف ؟؟

درباس : ههههه .. أي هذا اذا ما في صيفي يكتبون جدي تبعا لميزانية جامعة البحرين الضعفية ..
يالله تعبت من الحجي .. تعطيني كم ؟؟

طوبى : بس روبيه .. اههههه

درباس : يالله مع السلامة وان شاءالله يكون التوفيق رفيق دربك دائما ..

طوبى : شكرا خيو وموفقة انتي كمان .

[درباس]

ملاحظة : هذه محادثة كاملة .. وقد جُزأت تحت عنواين ليسهل فهمها أكثر ..


يالله اني تعبت والألوان فرت راسي

نبي ردود حلوة .. وخصوصا إلي بالمرحلة الجامعية ..

والي عنده أي ملاحظات أو إضافات يحب يضيفها .. بعد أهلا وسهلا

تمسون على خير

Derbas Shajret Tooba

T H E E N D

[شجرة طوبى**]

أهلين شباب
أرجو أن تستفيدوا من هذه التعليمات
ومشكورة يا درباس على النتسيق
تحياتي
طوبى

[الـعـرَّاب]

جهد جبار و رائع جدا من اسمين لا نستغرب إذا ما جاء الإبداع منهما ..

لي مداخلة واحدة تتعلق بالتسجيل المبدئي و هي نصيحة من مبتدئ في عالم الجامعة خخخخ ..

سجل ما تستطيع أن تسجله .. سجل الأخضر و اليابس .. سجل 10 مواد لو كان الامر ممكن !!
سجل حتى و ان كان موعد امتحانات المادتين في ذا اليوم و لكن في وقت مختلف ..
يقولون في الجامعة : سجل مبدئي و انت جذي ( و انت اوكي يعني ) ..
لكن الحقيقة هي : اذا لم تسجل مبدئي ، فأعد نفسك لجحيم الحذف و الإضافة ..

و القاعدة هي : سجل الأخضر و اليابس ، و انتظر نصيبك ، و تذكر أن الحذف سهل و الإضافة نار جهنم !

[نجم المنتدى]

جميل جدا هذا الجهد ... تستحقان عليه جزيل شكري و تقديري ...

[مهندس الكلمة]

أعتقد أنه الموضوع المميز في الوقت المناسب تزامنًا مع فترة التسجيل

وبداية العام الدراسي الجديد


أرجوا من الأخوان في الادارة وضع اعلان عن الموضوع

[شجرة طوبى**]

..... أشكر

كل من خط كلمة شكر وعرفان
للي ولصديقتي الغالية درباس
.بالفعل فكوننا نساهم
في نشر الفائدة فهذا يعني
لناالكثير...
واشكر الأعضاء الكرام على ثقتهم
الغالية بنا.
ونحن لا نبذل كل هذه الجهود
إلا من أجل إفادة أعضاء عالي نت
وخصوصا المبتدئين في الجامعة
داعية من الله ان تعم الفائدة على الجميع
وأن يوفقنا لمساعدتكم و خدمتكم
تحياتنا لكم
طوبى** درباس

[حنان]

معلومات مفيده
وفي نفس الوقت مفيده وسهله للطلاب المستجدين في الجامعه

ومثلما ذكرت الاختان موقع الجامعه توجده به المعلومات

لكنني ارى ان هذا الحوار به المعلومات وهي اسهل من ان تتنقل في الموقع لتحصل على المعلومات

حنان

[sweet flower]

شكرا اختي درباس واختي شجرة طوبى على هذا الجهد المبذول ..
استفدت واجد من المعلومات ..

اختكم ..